平治冷氣Plan告別蒸籠

雖然早前打完風、落過暴雨，不過近日天文台又發出酷熱天氣警告，萬一車廂冷氣唔夠凍，甚至冇冷氣嘅話，等如坐喺「蒸籠」咁難受。上個禮拜介紹過車廂冷氣嘅急救用品，專為對付小毛病而設，若然情況複雜，當然要搵專家代勞，仁孚行嘅平治冷氣淨化服務就可對症下藥。

若果以年份較新嘅歐洲車為例，冷氣系統多數都好襟用，好少出現「漏雪種」問題，較為常見引致車廂製冷不足嘅原因，莫過於香港空氣質素差、空氣滿布塵粒，日積月累之下，冷氣塵隔及散熱系統就會吸入大量塵粒，影響製冷功能，出現「有風唔凍」嘅尷尬現象。

加碼出埋消毒劑

遇到呢個問題，冇得懶、亦冇得慳，只有「的」起心肝洗冷氣，而大部分歐日車款嘅冷氣塵隔及散熱部分，都置於乘客位前面嘅首飾箱底部，拆除過程有一定難度，似乎都係搵代理出手可靠啲喎。

據仁孚行維修中心售後服務部經理Bryan表示，通過清洗塵隔及散熱部分，都可解決大部分汽車製冷不足嘅問題：「就以仁孚行推出嘅平治冷氣淨化服務為例，係專為平治及smart車主而設，收費$1,480，專業技師會先檢查冷氣系統有冇漏雪種；若然雪種正常嘅話，好大可能問題係出於冷氣系統積塵所致，我哋就會檢查塵隔是否夠期更換，同時會用埋專為平治車系而設嘅冷氣清洗消毒劑，徹底清洗冷氣系統。」根據現場示範，技師會將呢款消毒劑注入清洗冷氣專用嘅壓縮槍內，之後注入冷氣系統，據知對因為塵粒積聚而孳生細菌而造成嘅異味，清除功效特別高，加上效果持久，令製冷功能恢復正常。

勤抹風口輕而易舉

預防勝於治療，就算未有問題出現，車主都唔好大安旨意。唔少人會喺車廂內進食，甚至食飯盒開餐，呢個Moment如果冇開到鮮風系統，食物嘅味道就會被冷氣系統吸入，加埋吸煙嘅焦油，仲有大熱天時嘅汗味，統統都有機會被塵隔及散熱器吸收。

如果車主長時間都冇清洗，加上潮濕天氣易生霉菌嘅影響下，就好易令冷氣系統傳出異味，所以車主應該定期清潔車廂，以免留低食物殘渣；順便嘅話，可以定期用稀釋後嘅消毒劑抹一抹冷氣風口，就可以減低細菌孳生嘅機會，咁簡單，何樂而不為？一於就趁今個夏天實行啦。

查詢：3711 3843（平治汽車仁孚行售後服務部）