《New Super Mario Bros. 2》有Fun又有金

出動得Mario同Luigi，即代表力谷主機銷路嘅時間又到喇！今日推出嘅《New Super Mario Bros. 2》屬任天堂一等一大作，可以話係為同樣今天推出嘅加大碼新手提遊戲機N3DS LL護航！小記估計唔少Fans都會自動科水買齊遊戲同大芒N3DS LL主機。今次遊戲玩法就冇乜大變，而賣點係金幣特多，並追加唔同Power-up方法拎更多金幣，向着要蒐集到100萬枚金幣以成為「黃金瑪利歐像」的目標進發！

巨大Mario繼續登場

有追開《Super Mario Bros.》，即大家慣常叫嘅《孖寶兄弟》系列，都好明白遊戲嘅內容，就係Mario跟Luigi以橫向捲軸玩法，通過重重機關救出Peach公主；要變，就惟有改變Power-up的招數，令Fans們唔會覺得難上手之餘又有新意。上集在NDS推出嘅《New Super Mario Bros.》其一大賣點是食巨大蘑菇化身成巨大Mario，撞爛所有磚塊同水管直衝終點。當然巨大Mario仍然會同火球Mario等經典造型在新遊戲上登場，另外仲加入好「金」嘅新Power-up造型。

變身黃金嘜

新造型有幾「金」？其一係「黃金Mario」，只要頂磚頂出黃金花，食咗就會化身成為「黃金Mario」，拋出的是黃金球，會將磚塊變成金幣，那便可盡情地蒐集版圖上的金幣。另一個「金」造型係「黃金方塊Mario」，將黃金方塊戴上頭後邊行邊跳，都會跌出金幣，不過金幣數目有限制，每個黃金方塊只會跌出100個金幣，當跌完或中途受傷就會失效。遊戲另收錄「黃金環」模式，在一定時間內敵人會變黃金，打倒敵人會跌出比平時更多金幣，咁就可以狂搶金幣了！

無線雙人合作

本作唔係一味加新Power-up造型，其實都仲有念舊嘅一面，好似重新加入十多年前已消失嘅「尾巴Mario」，靠揮動尾巴飛上天打敵人。遊戲亦引入新玩法，其一係名為「黃金狂衝」的遊戲模式，可以任揀80個遊戲版圖中嘅其中三幅，然後連續挑戰鬥攞金幣，不過呢個模式內每關嘅限制時間會比正常短，挑戰性更大，但完成每版後，都會酌量加番時間畀大家繼續挑戰。講新意又點可以唔提雙人Local Play合作玩法，即係兩個玩家各有N3DS或N3DS LL及遊戲軟件，就可在無線連接下啟動雙打合作模式。雙打同單打有咩唔同？首先金幣數目多一倍，而且只要同時發動雙人Pat Pat着地攻擊，就可震低晒畫面上所有敵人，這招必殺技姿勢就冇乜，但勝在夠實際！

INFO

類型：動作

開發：Nintendo

平台：N3DS

推出日期：今天

售價：¥4,800（約$480）

查詢：2359 7998