《瑪奇英雄傳》改頭換面 強戰網絡
認得出佢係咁多年都大受歡迎嘅Online遊戲《瑪奇》嘅外傳嗎？認唔出其實都好正常，原版《瑪奇》以休閒風格去打造夢想生活為賣點，但剛剛在香港上架嘅《瑪奇英雄傳》就賣3D真實戰鬥，一眾八頭身華麗角色擸齊武器打怪，某程度上都係貼近這幾年玩家口味。所以，《瑪奇英雄傳》之前在韓國上市時大受歡迎，更得到韓國遊戲界最高榮譽大獎，可以話係今年夏天登陸香港最強嘅Online Game！
跟原版共享世界觀
《瑪奇英雄傳》跟《瑪奇》都一樣，同由韓國NEXON所開發，而且《瑪奇英雄傳》早在2010年已喺韓國推出，並大受歡迎。當然過咗幾年，時勢唔同，玩家的口味亦已經改變，《瑪奇》的成功方程式都難以在新遊戲上翻兜，所以廠方開多個外傳遊戲《瑪奇英雄傳》，開拓多一條戰線都合情合理。外傳遊戲繼承原版的世界觀，又或者可以咁講，外傳遊戲查實係發生在原版遊戲一千年之前，用上北歐凱斯特神話故事背景，未玩過原版《瑪奇》也影響不大。
四大型男索女角色
外傳遊戲可以話係改頭換面推出，如遊戲人物設定就用上八頭身設計，更用上Valve開發的「Source引擎」提升3D戰鬥時的畫面表現，能夠做到細膩的攻擊動作，以及可以結合環境的物理作用，打爛場景上的物件，全都係現今頂尖遊戲的要求。不過遊戲唔能夠任意選取路線及職業分類，每個職業都要由所規定的角色所扮演，男女性別亦改唔到，這點Online機迷要適應。現時登場嘅四個角色都係型男索女，有冇得揀都並非太大問題，好似有擅長揮舞戰鐮的女魔法師「伊菲」、攻擊速度無人能及的雙劍男戰士「利斯塔」以及一手拿劍一手拿盾的女防禦高手「菲歐娜」登場，同最後加入、擅長遠距離攻擊的弓箭手「凱」。
場景互動打怪
每個角色有唔同嘅攻擊特性，但大致上可劃分為普通攻擊及重擊兩種，而兩者組合時更能配搭出各種技能，唔似其他同類遊戲要用點擊方式發動，比較似家用遊戲的Chok招，遊戲就可以任意由玩家自行切換鼠標模式、鍵盤模式、控桿模式操作方式。除主武器之外，亦可使用輔助武器幫手攻擊，譬如可購買長矛、炸彈等道具傍身，打怪時就可以大派用場。輔助武器等道具除可以用真金白銀購買之外，亦可以同場景互動，擊碎如瓦缸或石柱等物件，又或者瞄準怪物特定部位連續攻擊就有機會得到專屬道具。除咗武器之外，戰鬥時的趣味還來自現場環境，要考慮點樣利用牆壁同地面環境的特點去擊倒怪物，玩時都要動腦筋。
INFO
類型：ACT-MMORPG
開發：NEXON
平台：PC
推出日期：已推出
售價：$18（Heroes產品包）
網址：http://hk.beanfun.com/MH/
四大登場角色
「伊菲」以魔法及煉金術代替物理攻擊，並能使用法杖及戰鐮。
「菲歐娜」使用單手武器及盾牌，攻守兼備，可用的武器有單手劍、戰錘、盾牌或巨盾。
「凱」頭腦機靈，體力超強，使用弓箭作武器，可自由變換成長弓及短弓。
「利斯塔」速度極快，能雙手持不同武器使出獨特招式，可用的武器有雙劍及長槍。
戰鬥時可Chok招兼連招出擊。
在採用Source遊戲引擎下，多個角色混戰時仍保持相當水準。
遊戲延續《瑪奇》的世界觀，但時間背景為原版一千年前。
強調真實打擊感覺，所以打怪時血花四濺，跟原版《瑪奇》差別都幾大。
即使靜態畫面的表現亦夠細緻。