手指運動會

何止倫敦,今個夏天全球都捲起運動熱,就連近期不少iPhone新遊戲Apps都以運動為主題,大家只要花最多$8,就可以一齊用手指投入體育熱,為各國健兒加油打氣!當然更重要是這些運動遊戲有趣又好玩,搭車時、臨瞓前就有細藝喇!

《Stick Tennis》火柴人挑戰大滿貫

除網球四大滿貫賽事外,四年一度的奧運網球項目都備受球星重視,拎埋奧運金牌達成「金滿貫」先夠威!《Stick Tennis》就係操控火柴人打網球,靠向左或向右捽手機畫面控制網球路向,例如向右上方一捽,網球會向右方打去而且落點較深,捽向右下方的話就落點較貼網,加上火柴人公仔會識得自己走位,唔難上手,但要掌握高超技巧就要花時間苦練捽畫面的時間性。遊戲雖然係免費下載,不過就好似現時大部分手機遊戲一樣,要靠In-App Purchase賺錢,例如想打四大滿貫賽事就要逐個買,每個$8,想要同真正網球名宿對打,就要花$23打包買個World Domination下載包,唔係就只得難度較低的練習賽玩咋!

下載費用:免費

平台:iOS 4.2

《Score! Classic Goals》重演經典入球

實為另類風格足球遊戲,到底有幾另類?佢唔似一般足球遊戲要控制整支球隊進攻及防守,只係將眾多真實世界的入球片段重新演繹一次,玩家可利用俯視圖控制出波路線同球員走位入波得分,果然夠另類。遊戲更網羅每個年代的經典入球,要完成每個年代的20個入球場面先可以開啟新時代,啱晒筆者呢啲「老」球迷。

下載費用:$8

平台:iOS 5.0

《Big Win Baseball》抽卡打棒球

《Big Win》運動系列跟其他運動遊戲玩法都幾唔同,以卡片遊戲方式進行。遊戲開始時會得到一隊球員卡同幾張強化能力卡片,強化能力卡片屬消耗性設計,用完一次就要去商店購買先得。要打贏比賽,就靠玩家的排陣同運用強化能力卡片的技巧,當然有超級球員幫手就事半功倍,同樣地要去商店畀錢抽卡抽球員,玩法有趣。始終棒球在香港比較小眾,同廠尚有另一套原理接近的遊戲《Big Win Soccer》,或者會更啱大家口味。

下載費用:免費

平台:iOS 4.0

《Thumb Fit Olympics》狂撳玩短跑

經過長年累月用手機打短訊,好多人都已經進化成為手機上「鍵盤戰士」,《Thumb Fit Olympics》運動會遊戲上就可大派用場,遊戲只集中在短距離的徑賽項目,例如100米、200米及400米短跑及跨欄比賽,靠兩隻手指鬥快喺iPhone畫面上狂撳加速,係人都識得玩。為咗增加遊戲的趣味性,玩家更可以代表自己的國家或地區上陣比賽添!

下載費用:$8

平台:iOS 5.0

《Toons Summer Games 2012》卡通角色競技

嫌其他運動遊戲太過正統,以可愛卡通人物做主角的運動會遊戲《Toons Summer Games 2012》就能迎合大家。遊戲內容做得都算豐富,有游泳、單車、乒乓波、橡皮艇同舉重等多種運動項目,靠捽畫面體感方式操控,例如操控烏龜游100米時,要不停打圈加速;舉重時可向上向下捽嚟舉起啞鈴外,還要保持平衡幾秒先至可以過關。

下載費用:$8

平台:iOS 4.0

Brian