Online萬人斬女王科幻黑睡蓮
網絡世界，千奇百怪，打Online Game除咗可以升呢，仲可以增加思考速度1,000倍，幫助自己喺現實世界「醒」人一籌添！由人氣輕小說改篇而成嘅動畫《Accel World》，近日喺日本熱播，當中人氣最高嘅機體、由主角黑雪姬所扮演嘅「黑睡蓮」（Black Lotus），就成為Bandai Figure Rise系列嘅最新模型，忠實重現機體嘅優雅身段，又利用大量透明紫特效配件，立體化展現異能「絕對斬擊」嘅速度感及威力。
《Accel World》描述距離現在不遠嘅未來日本，每個人都透過頸上嘅「神經連結裝置」，進入網絡社交平台同其他人溝通，學生會副會長黑雪姬所玩嘅網絡遊戲《加速世界》，就有能夠讓參加者提升思考速度1,000倍嘅額外技能。喺呢個Game裏面，黑雪姬就以「黑睡蓮」姿態出現，角色造型恍如一位黑色幪面女俠，就似早年嘅「夢戰士」，四肢都裝上刀鋒，所以角色唔會企定定喺度，而係飄浮移動，模型就附上兩種展示角度嘅台座，對應飄浮及俯衝兩種姿勢，另一方面，筆者喺素組後發覺欠缺光澤感，所以噴上「光澤黑」以作補救。
落齊氣流特效組件
就如主流Online Game一樣，《加速世界》都實行Level制，10級就係封頂等級，而黑睡蓮連同其餘六位玩家，都係去到第九級嘅「純色七王」，若然想再升呢，就要KO其他六位，一旦戰敗就要登出遊戲，永久喪失參加資格，就連思考特快嘅異能都會消失，因而引致連場廝殺。動畫中黑睡蓮擁有超強嘅近戰攻擊力，絕招「絕對斬擊」可以斬開世上任何物質，同時捲起紫色嘅氣流，模型就備有三款特效重現，其中兩款套喺手刀上，另一款就放喺地下，模擬出招時嘅高速氣流。
換件形式簡易變Mode
黑睡蓮擁有「通常」及「戰鬥」兩種形態，分別就係後者嘅手刀變長、腳刀爆甲，模型就以換件方式呈現手刀部分，至於雙腳，除咗膝甲加件外，小腿嘅爆甲效果就透過改變兩側外甲嘅安裝位置，從裂縫位顯露透明紫嘅內部結構。可惜戰鬥形態嘅雙耳部件，只係一件透明件，需要玩家自行塗上黑色，冇得懶。
查詢：2433 1828（瑞華行）
Figure-rise 6 :Accel World-Black Lotus＜BR＞建議零售價：$149
日文版《電擊Hobby》八月號都送黑睡蓮 Q版Figure，人氣認真高。
戰鬥形態
Step1：雙耳會爆甲裂開，不過黑色位置就要玩家自行塗裝。
Step2：腰位設計成上、下兩層裝甲，露出內部嘅紫色結構。
Step3：膝甲加裝透明件，再改變埋小腿側甲位置，就大功告成。
通常形態
Step1：雙耳係一件過嘅黑色部件。
Step2：拆走大手刀嘅腕甲，再將腕甲裝喺細手刀上。
Step3：小腿側甲移位，遮晒所有透明位。
飄浮移動狀態嘅黑睡蓮，要靠台座幫手Set位，加埋特效配件就做到攻擊姿勢。
特效組件有成三款咁多，台座又有兩種角度，仲可以加高，設計周到。
戰鬥形態所需嘅換裝組件，一對大型手刀最搶鏡。
動畫中黑雪姬喺社交平台嘅造型，就以一身蝴蝶公主打扮示人。