Optimus 4X HD超班靚芒煲劇架勢

好多人都鍾意用手機隨時睇YouTube、PPS等影片網站,不過,一套成百分鐘嘅電影,屈就喺個暗淡無光嘅芒仔度觀賞,長期睇猶如虐待眼睛。LG最新旗艦作Optmius 4X HD就冇有怕,事關佢採用自家4.7吋720p True HD IPS靚芒,色準冇偏差,睇片誇啦啦!加上內置「指間快搜」、「畫中畫同步預覽播放」等睇片專屬新功能,仲唔係今期嘅「戲王之王」?

其實Optimus 4X HD早於二月舉行嘅MWC 2012上已公布,當時更加係全球第一部現身嘅四核手機。可惜HTC、Samsung嘅四核手機都後發先至,一一應市,LG呢部機王竟事隔五個月先推出!不過初步看來,新機軟硬件的配合都做得相當好,應該唔會令用家失望。

超級靚芒 還原實物

想當日喬教主向各位果迷力推Retina Display,好多朋友都驚嘆手機屏幕竟然可以靚成咁;亦因如此,激發起各廠商研發靚芒嘅動力,其中LG可說是最積極一員。Optimus 4X HD採用名為True HD IPS的屏幕,就咁聽個名已經好架勢;原來屏幕最大優點係每一點像素都用上平均大小的紅、藍、綠三原色所組成,令到顯示色彩比AMOLED屏幕更為均勻,兼且唔會偏色;加上新機4.7吋芒嘅解像度及像素密度分別達720p及313ppi,顯示分外細緻,煲劇、睇片當然勝人一籌!LG即場仲搞咗個True HD IPS跟AMOLED嘅比試,先將屏幕文字用放大鏡放大,發現前者文字邊緣位置明顯紮實得多;再用兩機同時預覽拍攝,True HD IPS屏幕比AMOLED更能忠於實物顏色,效果好好多。

軟硬兼施 睇片三寶

屏幕又大又靚,用嚟睇片簡直係最佳拍檔,所以新機亦加入唔少為影片而設嘅新功能,包括「畫面放大縮小」,可以喺影片播放時隨時放大或縮細畫面,想睇清楚主角個樣都冇問題;而「畫中畫同步預覽播放」就可以喺影片列上一邊睇片、一邊揀片;最方便就要數「指間快搜」,因為喺Timeline就可以預先睇到影片預覽,FF或Reverse時就肯定快而準!

影相方面,800萬像素鏡頭的規格雖然未算頂級,不過對焦又快又準,仲可以拍攝1,080p全高清影片;而且又加入特別功能「相片預拍」,於按下快門前一刻就會開始拍攝,記錄總共五張相片,任你揀幅最好嘅相片儲存起來,實用、趣味兼而有之。

採用四核 更見慳電

然而新機的超強規格亦不能忽略,因為Optmius 4X HD是LG首部四核手機,採用NVIDIA Tegra 3四核心處理器,1.5GHz時脈配合1GB RAM,運行Andorid 4.0以至多工作業都遊刃有餘;而在四核心之外,同時備有一顆低電壓核心,當遇上播放音樂、待機等簡單任務時就會啟動,唔會影響操作效率之餘,仲慳電得多!難得是新機軟硬件的超強配合下,仍然可兼顧外形,8.9mm薄切機身,加上機背的皮紋,外形似足Prada Phone;而且2,150mAh的電池又可以隨時更換,確實方便。

SPEC

制式︰GSM四頻、UTMS 850/900/1,900/2,100

處理器:NVIDIA Tegra 3 1.5GHz Quad-Core

屏幕︰4.7吋True HD IPS(1,280×720解像度)

鏡頭︰800萬像素連LED閃光燈、支援1,080p影片

記憶體︰1GB RAM/16GB ROM、支援64GB microSD

對外連接︰藍芽4.0、21Mbps HSDPA、Wi-Fi N

電池容量:2,150mAh

通話時間︰9小時(2G)、10小時(3G)

備用時間︰730小時(2G)、680小時(3G)

作業系統︰Android 4.0

體積︰132.4×68.1×8.9mm

重量︰141g

同場加映:Optimus L5 抵玩4.0

近期LG亦推出了另一部L-Style系列的新機Optimus L5,雖然屬$2,000唔使嘅中階機,不過外形就相當輕巧,冷金屬外殼加上皮紋底殼,大方得體!而且新機仲已經預載Android 4.0系統,用4吋屏幕上網、睇片應該唔錯!唯一美中不足是仍然採用800MHz處理器,玩多工就辛苦少少。

查詢︰3543 7777

Vincent

$4,998

機背殼的皮紋設計,與Prada Phone同出一轍。

內置16GB ROM之餘,仲可加記憶卡。

電池容量高達2,150mAh,以一般四核手機而言,續航力都算不俗。

支援NFC,隨機附送兩款NFC情景模式牌仔,拍一拍就轉Mode,但要先在LG TAG+介面揀選設定。

鎖頁介面上可以自訂快捷鍵,解鎖時直接開啟相關Apps。

全新的介面非常流暢,仲提供不少實用Widgets。

採用LG獨家的UI,可自訂主頁的Icon及資料夾。

可以隨時於畫面啟動「Quick Memo」,方便記事。

「Quick Backup」可以將系統資料和Apps全部備份至記憶卡。

體積比4.8吋嘅GALAXY S3(右)細少少,長方形的設計風格亦有所分別。

影片功能一覽
「指間快搜」:用手指喺Timeline上一篤,就會睇到影片預覽畫面。

「影片放大縮小」:隨時放大及縮小播放中嘅影片畫面。

即場測試True HD IPS VS AMOLED
放大鏡將屏幕上文字放大,True HD IPS(右)的邊緣位置比AMOLED(左)紮實得多。

兩機同時以相機取景預覽,True HD IPS(左)屏幕比AMOLED(右)更接近實物,亦沒有出現AMOLED對比度過高的問題。

試相
室光下成像不俗,惟雜訊頗多。

Optimus L5 $1,998