白色PS Vita首賣 率先試玩多款新作

早前新白色PS Vita正式在港推出，SCEH除咗大搞首賣活動之外，八間全新PlayStation Platinum Shop亦正式開幕，仲提供最新白色3G加Wi-Fi版PS Vita首賣優惠添！不過對於一早買咗PS Vita嘅機迷嚟講，有乜新PSV遊戲玩先至最實際，焦點所在係年度大作《LittleBigPlanet》，並首次在港舉行試玩，仲有得試兩套中文化咗兼且會好快推出嘅《仙境傳說：奧德賽》同《Persona 4 The Golden》，買新機後，暑假就大把Game玩！

《LittleBigPlanet》雙人同機對打

此遊戲內容都唔使多作介紹，今次在PS Vita上推出的版本，最大嘅不同肯定係操控方法。當日試玩版本提供故事過版模式，以及可同時一機多人對戰的迷你遊戲，當然亦結合了PS Vita的觸控式操控方法，譬如在過關模式中，便可向下拉低彈跳台將Sackboy彈出高點，再要即時按R鍵黏附在高處的滾輪移動，初初玩時都幾手忙腳亂，但跌死幾次後，就開始掌握得到。

正式版遊戲設有六個大主題及45個新故事關卡，而且更一如PS3版能夠支援創造關卡玩法。PSV版更能夠在單機內支援多人齊玩迷你遊戲，正如機械人大戰就容許兩人一齊玩，一人一方，玩法容易，只係驚玩得太興奮，拎唔實部遊戲機！

INFO

類型：動作

推出日期：2012年內

售價：待定

《仙境傳說：奧德賽》加齊三個擴充版

亦即係《Ragnarok Odyssey》的中文版，而且今次所推出的更係中英合版，將之前日版推出的三個Expansion擴充包一併收錄。玩家可挑選劍鬥士、刺客、牧師等職業出戰，中文任務提示更清晰易明，令大家組隊打怪、打頭目時更手到拿來！

INFO

類型：動作

推出日期：今季

售價：待定

《Persona 4 The Golden》完全體驗

日文版其實都推出咗無幾耐，但遊戲有唔少文字交代，未必個個玩家睇得明。今次換上繁體中文介面，就可以完全體驗遊戲入面現實與非現實交錯的世界觀。相比PS2版《Persona 4》，PSV版就追加咗唔少新元素，例如加入新角色瑪麗，又加入坐車到海邊、滑雪等活動，以及可向PS Vita網絡上的玩家尋求支援。

INFO

類型：角色扮演

推出日期：待定

售價：待定

《Dokuro》幫公主逃走

今日推出的《Dokuro》，遊戲設計簡單有趣，以模仿粉筆的筆風，描繪職位低下的骷髏人幫公主逃走，Dokuro（髑髏）就係日文中骷髏人咁解。玩家基本上係透過控制骷髏人啟動各種機關，令公主可以搵到出路自己逃走。遊戲亦支援到PS Vita嘅前方及後方觸控板去切換所身處的世界，骷髏人身處冥界時可以引領公主但不能攻擊敵人；當身處凡間時情況就剛好相反，甚有玩味。

INFO

類型：益智動作

推出日期：今天

售價：$188