造型•變形兩全其美EM合金BlueJet
針無兩頭利，標榜全變形嘅玩具，由於變形結構複雜嘅關係，難免犧牲造型美，港產Action Toys最新推出嘅EM合金BlueJet阿積，既要變飛機，又要兼顧機械劍士嘅英氣形象，故此變形方法由全變形改為拆件組裝，以求兩全其美，而且機體比例跟「超合金魂」嘅功夫漢出奇脗合，可以組成全家福，《天威勇士》嘅粉絲又豈能錯過！
組裝代替完全變形
雖然EM阿積做唔到完全變形，但拆件變身所用嘅組裝補品，造工亦算細心，令噴射機形態都跟足動畫中嘅流線比例，而且組裝過程一啲都唔馬虎。首先要將阿積全身「大卸八塊」，當中機械人形態嘅頭部、膊頭連雙手、下盤連大腿統統唔要，然後主體部分連接收納後嘅肩膊引擎及下盤支架，再將前後腳掌上下掉轉，變成機尾嘅噴射口；跟住拆走收納狀態嘅機翼，換成展開形態，最後駁埋長條形機頭就大功告成。可惜白色機翼嘅線位過淺，翼上嘅滲線出晒界、走晒樣，細節位打晒折扣。
造型手掌唔夠喉
雖然組裝式變形，始終唔及完全變形好玩，但係EM阿積嘅靚仔Look補番唔少印象分，其中額頭尖位連風鏡面相、幼腰、長腿等似足動畫形象，英氣十足，企定定當景品擺甫士，已經夠晒Chok。而且整條小腿更加採用Die-cast炮製，前、後腳掌又有雙Ball Joint連接，增強接地性。至於關節活動能力只算中規中矩，尤其是膊頭、膝頭，以至頸位嘅可動幅度相當有限，應付一般劍招甫士都算OK，但要做到凌空激劈，或者翹起雙手睥睨眾生嘅有型甫士就有好大難度，況且造型手掌數目甚少，只得左、右握拳，以及左手開掌、右手握劍合共四款，即係話只可以右手揸劍，大大限制咗擺甫士嘅選擇性，如果廠方打算出埋阿積嘅好兄弟—鑽頭機械人阿樂嘅話，希望可以改善以上問題啦！
查詢：2390 9843（Action Toys Ⅱ）
EM合金 EM-03《天威勇士》BlueJet 訂購價：$550
變身所用嘅組件一覽，數量相當多，但造型手掌就出奇地少，令人摸不着頭腦。
變身Step by Step
Step 1： 變身前先要全身解體，將頭部、雙手及下盤拆走；
Step 2： 變形關鍵在於主體部分駁上收納雙手嘅肩膊引擎，以及下盤支架；
Step 3： 將腳掌上下反轉變成推進器，再換埋機翼，然後直插主體；
Step 4： 大功告成！噴射機造型極富流線美，重現動畫中嘅比例設定。
腰位設有Ball Joint，可以大幅度扭腰擺甫士。
上臂跟肩甲採用分件處理，可惜膊頭唔可以向上抬起，限制咗雙臂嘅活動幅度。
雖然膝頭有雙關節，但礙於大腿連接處嘅設計未盡完善，令屈膝角度只有90°左右。
機翼滲線工夫實在不敢恭維，出界頻頻，希望廠方嘅下一款新作會徹底改善啦！
配合專用台座擺出突刺劍招，已經係EM阿積郁得最盡嘅甫士。