on.cc 東方互動主頁

靚芒睇入波ViewPad VB97

今屆歐國盃踢得如火如荼，但每場波都在凌晨播放，唔想捱眼瞓，惟有第二朝上網睇賽事精華。搭車返工時，好多人選擇用手機睇，然而屏幕咁細，莫講話個波睇唔清楚，就連球員誰屬都要估估吓！ViewSonic新機VB97就冇以上問題，事關佢內置9.7吋IPS LED背光屏幕，不僅尺寸夠大，仲要反應快、可視角度高，用來睇高清精華就Fit到漏！

鑑於市場需求，近年Tablet PC愈趨輕巧，由8.9吋、7吋再演變成5.3吋；相反最初的9.7吋Tablet，卻因為體積問題，以及面對新iPad這強大對手，而變得買少見少。今次ViewSonic ViewPad VB97便屬市場上少有的大廠9.7吋Tablet，為喜歡大芒卻非Apple迷的用戶，提供多一個選擇。

睇波冇殘影

以往ViewPad平板電腦一向予人山寨感覺，設計偏向平實，但今次VB97卻打破常規，外形比以往「靚仔」得多。首先，外殼由鋼化玻璃面板及鎂鋁合金打造，不但耐磨襟刮，而且僅厚9.6mm的機身四邊都採用圓弧設計，手感相當不俗。另外，它採用了9.7吋IPS LED背光屏幕，尺寸、材質均與新iPad看齊，最重要是IPS出名還原度高兼反應快，用在此機可視角度更高達178°。以足球精華實測所見，畫面清晰、顏色準確，即使皮球高速移動都冇殘影，用來睇波可謂賞心悅目。

打機暢快唔Lag

規格方面，VB97僅屬普通級數，用的ARM Cortex A8 1.2GHz處理器，相比現行主流雙核Cortex A9的平板電腦，不免稍為遜色。然而，它的驚喜是記憶體為1GB DDR3，比很多對手的512MB高出許多，縮短開機時間，同時又令程式載入速度大為提升。另一方面，受惠於GC800 GPU獨立顯示晶片，用它打機絲毫唔Lag，而最重要是食到1,080p高清片，真正比其他Tablet「多睇頭」！特別一提，它還配備了mini HDMI輸出，可隨時把畫面輸出至大電視欣賞。

未盡完善的ICS

跟隨潮流，VB71搭載最新的Android 4.0 ICS作業系統，但由於授權問題，它只保留了4.0的介面及功能，一系列Google原裝Apps如Play Store、Maps、Calender及YouTube均無影無蹤，予人並非100%完成之感。幸好，廠方用其他第三廠的Apps來代替，例如《機鋒市場》、《百度地圖》、《搜狐視頻》就分別可用來搵Apps、指路及睇片，配合使用的話，就跟原裝ICS系統差不多。外接能力方面，雖然不設藍芽，但就支援IEEE 802.11n，而用戶還可另購外置3G USB手指作上網之用。