洛杉磯試玩《Core Blaze》圍剿兩大Boss

在月初E3遊戲展進行期間，台灣Gamania特別在會場附近包場搞咗個《Core Blaze》美國限定試玩會，畀世界各地傳媒率先試玩明年推出遊戲大作的兩幅新地圖及兩個新頭目，除咗畫面超靚以及打怪夠挑戰性外，最特別係仲有天氣系統，落大雨時畫面會沾滿水珠，像真度甚高，超前其他Online遊戲好多，難怪外國媒體都一致讚好！

四人戰線攻兩新版圖

今次Gamania都幾落本搞限定試玩會，會場內擺了12台電腦，分成三組，玩四人連線合作打怪外，仲展示了一系列概念繪圖、高過成個人嘅巨型長弓模型，仲有台妹跟美妞Cosplay，甚有睇頭！至於主菜自然落喺兩幅新地圖「靈山村」同「靜思森林」之上，傳媒可以自由揀選四大武器系統出戰，包括有雙刀、巨劍、長弓同刀盾，同「芒亨」都幾相似，但論畫面細緻度同流暢度，《Core Blaze》顯然較優勝，而且四人連線時都無任何遲滯感覺，移動同打怪都好爽快！

相剋道具制衡Boss

是次試玩版另一特別之處係加入天氣系統，天色會隨着時間變光或變暗，清晨遠方霧氣清晰可見，落大雨時連畫面上都沾滿水珠，大大提升遊戲臨場感，而且亦會影響任務的難易度。至於新出場兩個Boss都唔易應付，「偽山神」擅長幻術魔法，至於「刀勞鬼」攻擊力及力量都超強，集四人之力埋身都唔夠揪，經常被打到彈開九丈遠，要不斷飲藥水補血，多多命都唔夠死。經工作人員教路原來要因應Boss屬性進攻，要投擲出屬性相剋的炸彈先有機會暫時停止Boss進攻再衝前圍劈。而遊戲會以非線性發展，會因應時間、氣候、任務等元素交叉影響及玩家的決定而產生唔同的結果，實屬非一般MMORPG體驗，就算要等到2013年先會推出正式版，都算值得！

網址：www.coreblazeonline.com