夏日搞怪拖

夏天一到，各位收喺鞋櫃嘅拖鞋又係時候拎番出嚟喇！不過出到街，見到人人都着件Tee加短褲配人字拖，真係覺得有啲悶。小記都一直苦惱究竟炎炎夏日，點先可以突圍而出！其實大家除咗留意服飾搭配，亦都可以搵一對玩味十足嘅拖鞋，做盛夏出街服飾搭配嘅撒手鐧！

Alex Reporter

揸車過馬路

時代進步，物質豐富，家陣啲小朋友生活舒適，歎過佢阿爸阿爺嗰代多多聲！有機打、多靚衫不特止，連過條馬路都要自己揸車呀！不過，小朋友，行人綠燈，你唔係要停車嘅咩？OK！無情講，熄匙、車牌、身份證。

地點：旺角

Tony Editor

真係龜蛋

俗語有句「未見過大蛇屙尿」來形容別人見識少；老老實實，我真的未見過，但係就見過烏龜生蛋喎！話說寒舍裝修竣工，寵物烏龜姐急不及待要霸地盤，選擇去浴缸誕下三粒大小不一嘅未受精龜蛋！最奇趣係，三粒蛋差距頗大，有粒形狀似Jelly Bean，富有光澤！至截稿前龜蛋未有任何異樣，欲知後事如何，且看下回分解！

地點：黃大仙

Kiki Reporter

老翻福士

向來喜歡復古潮物的我，極喜歡Volkswagen Type 2 T1/T2貨Van，即是早幾年成日講嘅「餓靚之Van」。前排居然喺大埔發現疑似Type 2出現，白溝粉藍色的車身相當可愛！當我滿心歡喜衝上去，竟發現原來係架日本Van仔改（偽）裝！雖然舢舨充炮艇，單車扮摩托，不過都要讚吓車主有創意。

地點：大埔

CANDY Reporter