今夏榴槤瘋
如果你對榴槤有一份迷戀，那麼今個夏季一定不會失望，因為新種榴槤繼續飄香登場。今季依然由馬來西亞榴槤一枝獨秀跑出，帶來兩個新品種。而更好的消息是連超市和餐廳都愈來愈放肆，毫無顧忌地大賣榴槤甜品和零食，令榴槤狂迷繼續泥足深陷！
當造榴槤逐個講
單聽榴槤癡所言，似乎馬來西亞榴槤真的較受歡迎。其實自從新鮮馬拉榴槤進入香港市場後，泰國榴槤便一直被比下去，來到今年，泰國榴槤更被對手遠遠拋離，截至現時仍未見新品出現，反而馬來西亞榴槤則有新面孔，像首家引入新鮮原個馬拉榴槤的一田百貨，今年就從當地搜羅了兩個新品種─牛奶王及榴小妹，同樣各有性格。而除了新品種外，其他馬拉榴槤亦繼續大放異彩，如港人熟悉的貓山王、D24、XO、紅蝦等，另外泰國長賣長有的干腰及金枕頭亦默默應市，究竟真如榴槤癡所言馬拉榴槤更勝一籌？還是各有各滋味？一於睇下每款當造榴槤的個性，找出心頭好。
榴槤甜品登場
除了原個鮮榴槤，榴槤甜品都有好多捧場客，所以花款愈玩愈多，即使對「榴槤一向都是禁忌」的酒店也來分一杯羹，於自助餐推出榴槤甜品，讓榴槤迷吃個夠。
超市有條榴槤街
榴槤，某程度上是一種禁忌，它可怕起來可以生人勿近，誰願供應榴槤，就要有流失食客的心理準備，但最近行過超市卻見到一個奇景—一整排貨架，竟放滿榴槤副產品，像條榴槤街，香港兩大超市一田百貨及city'super更集中火力，推出期間限定的榴槤食品，許多前所未見，玩味十足，水準也有驚喜。
榴槤粉絲告白：吃榴槤吃到病
Agnes Chee 馬來西亞華僑，大馬著名兩性及美食專欄作者。
「首選馬來西亞榴槤，味道特別甘甜，香味又濃，試過有次吃得太多貓山王，先是喉嚨痛，繼而發燒。我只吃鮮榴槤，除了馬拉獨有小吃曼煎糕外，一切副產品皆不是我杯茶。」
每星期至少食一次
Jacky Yu 囍宴私房菜掌舵人、食譜作者，又曾主持飲食節目瓣數多多。
「一睇我餐廳的甜品Menu就知我幾鍾意食榴槤啦！一到夏天，差不多個個星期都要食一次先安樂，自己就偏愛馬拉D24同貓山王，味道強，在馬來西亞吃過一次便念念不忘，所以自香港有得賣後我就密密食。」
為榴槤流鼻血
Speed Kung 人氣飲食及烹飪blogger「東主有喜」，擅長自創菜式與人分享。
「以前一星期食2次榴槤，試過食到流鼻血，但仍無減我對榴槤的熱愛！其實泰國榴槤夠平，周街都買到，馬拉榴槤則甜美香濃，各有各好。」
食一個都嫌少
廖先生 超市生果部買手，對榴槤有深厚認識。
「作為生果買手，榴槤試得多，但一試了馬來西亞榴槤即深深愛上，它肉質Creamy，甜味中帶甘香，所以即使以前我可以一個人食一個泰國金枕頭，現在都轉吃馬拉品種，有時食一個都嫌唔夠，愈食愈上癮！」
貓山王
產地：馬來西亞
特色：核細，甘苦的Aftertase強勁，甚至乎甘味多於甜，具酒香，入口像絲般幼滑。一田百貨有售。
身價：$280，原價$350（a）
榴小妹
產地：馬來西亞
特色：體積細，殼身厚而肉偏細，肉質帶濕；入口清甜，但榴槤味唔夠強，似泰國跟馬拉榴槤混合版，易入口，適合初哥品嘗。
身價：$160，原價$190（a）
D24
產地：馬來西亞
特色：產地近吉隆坡，當地最受歡迎的榴槤之一。核中等，肉身肥厚，色偏白，口感軟硬適中，香甜而帶奶油味，吃罷甘味徐徐滲出。
身價：$160，原價$190（a）
XO
產地：馬來西亞
特色：因為味帶酒香，所以又名XO，論回甘味，始終不及貓山王，果核偏大，相對肉小，整體也算滑溜甘甜。
身價：$160，原價$190（a）
牛奶王
產地：馬來西亞
特色：肉尚算多而厚身，Creamy度不足，但味道極甜，帶微微苦甘，亦具酒香，但略嫌層次單薄，不及貓山王澎湃，多吃也不覺膩。
身價：$160，原價$190（a）
金枕頭
產地：泰國
特色：呈不規則的形狀，尖刺大細不一，果核小，香氣不算濃，但味道甘甜，不帶苦澀味，果肉軟滑適中。
身價：$2.4/100克（a）
干腰
產地：泰國
特色：尖刺最細最圓，果核大細中等，肉呈金黃色，氣味濃郁，入口甘香甜美，Aftertaste有淡淡的澀味，質感Creamy，質素不比馬拉榴槤遜色。永富有售。
身價：每磅$40（b）
榴槤撻（晚市自助餐中供應，c）成人$488、小童$250（星期日至四）成人$538、小童$270 （星期五、六及公眾假期）
這個榴槤撻採用急凍馬拉榴槤肉即點即焗，入口暖呼呼，曲奇餅底香脆，榴槤味不算濃，但餡料幼滑。
榴槤飄香豆腐布甸 $44（e）
囍宴甜．艺這款布甸做得細滑非常，豆香味不算濃，但卻嘗到清甜滋味；面層放了榴槤醬，這醬以鮮榴槤肉、椰汁、班蘭葉等製成，吃到絲絲榴槤肉，跟布甸很夾。
榴槤酥 $48（d）
翠亨邨一向都有推出榴槤酥，但為給予食客驚喜，今年將外形改頭換面；用的依然是泰國金枕頭，貪其榴槤味不霸道，配上牛油、吉士及雞蛋等做成奶黃餡，外層酥皮略嫌過厚，但餡料香濃不俗。
榴槤酥皮甜湯 $45（f）
在沛公甜品內供應的熱食榴槤甜品。酥皮內滿是大釘榴槤肉，質感軟滑，濃郁香甜，配以椰汁西米很不錯，創意滿分，即使柯打後要等20分鐘都值得；喜歡的話更可以$68吃到D24做的酥皮湯，但需預訂。
榴槤飄香班戟 $48（e）
此班戟比坊間任何一款都要做得好吃，因為內裏不含忌廉，而是百分百榴槤肉打成的醬餡，味濃帶甘甜，加上班戟餅皮是即叫即做，滑溜帶蛋香，跟榴槤醬是絕配！
榴槤飄香配私房雪糕 $58（e）
榴槤雪糕非新事，這個特別在供應雪糕之餘還淋上了榴槤醬；雪糕略嫌被奶味遮蓋，但其榴槤醬是用熟透榴槤肉打成，很足料，伴着吃，味道濃郁得很。
榴槤班戟 $22（g）
從雪櫃拿出後要攤約30分鐘才可進食；班戟皮似一般銅鑼燒，榴槤餡香濃。
榴槤撻 $22（g）
入焗爐以160℃焗20分鐘，撻底熱辣酥脆，餡料滑溜不俗。city'super有售。
榴槤蛋糕 $22（g）
榴槤餡細滑，難得在蛋糕鬆軟如一般海綿蛋糕，雪凍後吃更佳。
榴槤龍角包 $59（原價$80，a）
即是榴槤版牛角包，包內唧滿榴槤餡，焗熱來吃效果不錯。
榴槤班蘭瑞士卷 $59（原價$66.5，a）
吃起來有幽幽榴槤香，加了班蘭葉、忌廉做餡，尚算滑溜。
榴槤黃金角 $59（原價 $80，a）
醉榴香出品，順理成章選用了馬拉榴槤，味道香濃，外層酥皮也甚脆口。
Agnes Chee
Jacky Yu
Speed Kung
廖先生