高達少女第一彈Wing妹萌爆
唔記得由邊期開始，插畫師明貴美加就喺月刊雜誌《Gundam ACE》畫起「MS Girl」，嬌滴滴嘅女仔着起高達裝甲，擺明要勾起一眾高達迷嘅「萌」系基因。查實裝甲Crossover美少女呢條橋係由Konami帶起，將二戰嘅飛機大炮幻化成Figma裝甲少女，賣到斷晒市；Bandai咁醒目，一於乘勢推出「Armor Girls Project」系列，頭炮就係Wing Gundam少女雪菜。
身段自然 可動性差
筆者唔係風月版記者，唔敢對Figure身材評頭品足，不過雪菜妹均勻又唔誇張嘅身形，切合漫畫中嘅少女比例，睇落好順眼，尤其是胸脯尺寸唔會過於作大，而且鎖骨位用咗淡淡嘅陰影襯托，更見立體；面相方面，日系漫畫嘅水汪汪大眼仔當然唔少得。可惜關節可動性比Figma差得多，尤其胸、腰、腹三個位，只有上胸可以稍稍左右扭動，無法擺出仰望、俯身、扭腰等基本動作，還好主體塗裝未見鬆散、甩色，水口穿崩位亦少，算係補番唔少分數。
組裝容易 台座夠穩
講到最好玩嘅着甲Gimmick，今次以Wing Gundam EW為設計藍本，繽紛配色可以凸顯活潑嘅少女Feel，至於裝甲着法超簡單，先拆走手掌、再直接將腕甲套入前腕；雙腿亦先套上腳肚護甲，然後扣實兩邊側甲連腳面部件，最後安裝埋膝甲。至於胸甲連肩甲及腰位裙甲，有關節位可以左右打開，再從後扣實，組裝一氣呵成。
雖然素體可動性差，還幸裝甲爭氣，小腿兩側外甲跟腳肚裝甲都有Ball Joint，可以揭開做出Booster噴射效果，另外背翼有四組關節，可以獨立展開，擺出凌空甫士；若然大家有買Robot魂嘅Wing Zero Custom，更可為雪菜換上羽毛狀嘅背翼，事關兩者嘅背部連接榫位都一模一樣。至於武器，激光槍、激光劍及護盾都有齊，配合四對造型手，跟一個相當穩陣嘅台座，就唔怕冇腰骨拎起武器啦！
查詢：2433 1828（瑞華行）
Armor Girls Project—MS Girl Wing Gundam 建議零售價：$479
胸甲連肩甲設計簡單，肩甲連接處有Ball Joint，無礙舉手動作。
面相配件只得兩款，至於換頭方式跟大部分Figma一樣，簡單容易。
唔係個個日系女角都要賣肉先有粉絲，輕裝版雪菜身材勻稱，形象健康卡娃兒。
多得Figure本身膠件輕身，可以容易用到台座擺出持劍姿勢。
持槍時雪菜雙手唔多夠力，而且膊頭冇延伸關節，另一隻手未能托住槍身，影相要就角度。
羽翼有四節可動位置，可以上下展開，中央部分又有清晰標記。
小腿組裝繁複少少，但勝在實淨，美中不足是腳掌冇獨立關節。
護盾水印參考KA版設計，細節度大增。
小腿兩側外甲跟腳肚裝甲都有Ball Joint，可以揭開扮成Booster效果。
造型手有四對，包括拳頭、手掌，以及兩種不同幅度嘅握拳姿勢。