阿蛇！有人玩手指！
上堂無無聊聊，除咗望天打卦，又會玩吓手指，阿Sir梗係鬧爆：「成日玩手指，點會有出息？」咁你就錯喇，其實手指都可以玩得出神入化嘅，雖未至於拎諾貝爾獎，但係能夠博你一笑，都算係對社會有啲貢獻吖！
RL Reporter
狗狗海賊王！
做咩狗狗識夾手夾腳搬寶箱？唔通日本嘅海賊王推出狗狗版本咁熱血？非也非也，出名多古靈精怪念頭嘅日本人今次就向雪橇犬埋手，幫佢哋設計咗套「一狗分飾兩角」嘅海賊衫，狗頭加前腳就扮賊頭子，後腳加狗尾就扮賊跟班，至於狗身自然就是扮「寶箱」啦。外形冷酷嘅雪橇犬扮賊頭子，真係入型入格！
David Reporter
大吉利是
大家搞錯晒！唔好以為有人睇唔開，其實佢係由英國藝術家Antony Gormley創作嘅巨型雕塑，成個真人咁高咁大，最搞鬼佢竟然諗到將佢放喺巴西一座高樓大廈嘅邊緣上，唔知情真係以為有人想跳樓！巴西媒體幫佢改咗個名，叫做「自殺雕像」。巴西係其中一個金磚國家，大把世界，邊會咁易想死吖！
WL Reporter
伏已中
呢樽馬來西亞有售嘅腐乳，假如進軍香港市場的話，唔知銷量好唔好呢？你睇佢個名，中伏呀！香港人對呢兩個字特別敏感，但只要細心一睇，其實人哋叫「伏中」！咁仲大劑，伏已中……
地點：馬來西亞
Sammie H Reporter
神啊！請你給我Batman吧！
有人會向觀音借庫望發達，有人攝太歲求流年大吉，真係家家有求，信者得救。就好似呢幾條魚毛，假如佢哋有宗教信仰嘅話，即使子非魚，都焉知魚依家求神拜佛係Batman嚟探「缸」，阿門！吓？你唔知乜係「子非魚」？都叫咗你勤力啲讀書o架啦！
Ivy Reporter