日本App Store超多Online Game任玩

有日小記坐車，聽到有人話Galaxy S3推出之後，iPhone肯定備受打擊，以後係Android嘅世界！我當堂嚇咗一跳，然後就得啖笑！雖然新iPhone未出，但iPhone 4S都足以頂得住Android機，憑咩？就憑佢有全世界大廠幫佢出Online Game，你上去結交新朋友又得，上去死升爛升又得，雖然Android都有Online Game嘅，不過少囉！若你以為用iPhone都唔覺有好多Online Game玩？其實只要上日本App Store，唔單止有好多Online Game選擇，仲可以喺Game度買嘢，真係幾毒o架！

打破地域限制

上香港App Store，其實Online Game唔算多，點解？因為大廠Game都雲集日本App Store，香港用戶得個睇字！不過其實大家想玩，亦唔係無方法，首先用網頁或iTunes上日本iOS個App Store，再搵個免費App下載，藉此登記iTunes戶口，然後隨便搵個日本地址同電話Copy & Paste落去，再Skip咗信用卡資料唔填，咁就可以有個日本戶口。如想喺日本App Store買Game或Game嘅道具，就要照辦煮碗申請第二個戶口，不過呢個戶口登記完就要「搬屋」，改番做香港地址，你就可以填信用卡資料，以美金價格購買Game或者道具，聽落好似好複雜咁，其實做就好簡單！

方塊育龍《Puzzle & Dragon》

相信大家都可能聽過有人談論呢個Game，佢糅合消方塊同育成對戰成分，玩法十分新穎，首先揀五種怪物組隊，戰鬥形式就以消方塊嚟進行，一次過消愈多方塊，攻擊力就愈強。不過最好玩都係合成怪物，總共有多達190種怪物畀你合成，就好似舊時啲抽卡Game一樣！唔怪得唔少「儲卡控」，一見到呢隻Game就即刻玩到癲晒啦！

開發商：GungHo Online Entertainment

支援平台：iOS

下載費用：免費

日式古惑仔Online《不良道~ギヤングロード~》

此Game甚似係古惑仔Online之類嘅RPG，但實情佢係卡片類對戰Game至真。而最特別係呢個Game張張卡都畫到鬼死咁靚，當中又不乏俊男美女；玩法方面，係從龍、虎、鳳三個派別選一，喺戰鬥中獲取經驗值，贏咗仲可以接收人哋啲卡，屬於玩到停唔到手嘅遊戲。

開發商：Applibot

支援平台：iOS

下載費用：免費

Q版信長之野望《Sengoku Tenka Trigger》

呢隻Game同《Puzzle & Dragon》一樣，都係由GungHo Online Entertainment推出，所以應該都估到又係玩儲卡，不過就唔使玩消方塊，而係玩放置式RPG，即係安排好晒所有嘢，就可以放低佢一段時間，再返嚟睇結果；最正係啲日本戰國武將個個都耳熟能詳，即係織田信長、武田信玄嗰班，好有玩信長之野望Feel呀！

開發商：GungHo Online Entertainment

支援平台：iOS

下載費用：免費

至強立體RPG《IRUNA Online》

如果有玩開PC嘅Online Game，一定熟悉呢個《IRUNA Online》嘅玩法。因為佢走典型日系魔幻RPG風格，畫面仲要以3D顯示，玩過之後，相信你真係估唔到可以喺手機上打到咁高質素嘅Online Game！可惜呢隻RPG除日文之外，並唔支援其他語言，所以唔識日文就真係要惡補一下。由於本Game已推出多時，所以系統比其他Game完善，而且亦夠晒多人玩，絕對係識新朋友之選。

開發商：Asobimo

支援平台：iOS & Android

下載費用：免費

手機開無雙《三國志コンクェスト》

好多人都想喺iPhone上面玩無雙，呢隻《三國志コンクェスト》就可以滿足大家嘅願望。最好笑係，呢隻Game竟然唔係老祖宗光榮所出，反而係由Sega代勞，不過佢其實都係打嗰陣先會變無雙，其餘時間都係玩策略遊戲，比較似無雙Empire系列多啲。

開發商：Sega Corporation

支援平台：iOS

下載費用：免費