APP士多

iOS篇：寶麗來上身《Polamatic》

現時想玩寶麗來真係貴到得人驚，買「代用」的The Impossible Project相紙都要廿幾蚊一張，倒不如花US$0.99買個《Polamatic》App數碼版好過。除咗冇得真係印出來之外，用App扮寶麗來都實在幾神似，有十多種寶麗來邊框可揀，連污糟咗甚至摺皺咗嘅效果都做得到。

想用Marker在邊框上寫字？App內有多款字體兼顏色Marker可揀，但係字款大細就無得揀，而且字體太過工整，不太似隨意手寫嘅效果。始終Sharing先係王道，影完相後可以將相片上載到Facebook、Twitter、Flickr甚至係Instagram添！如果想玩得刁鑽啲，可以花錢買其他顏色Filter或者「過期」相紙，每次都只係US$0.99，買3個都只係夠現實世界買一張相紙咋！

系統：iOS 5.0

下載費用：US$0.99

Android篇：玩轉大鈍裁者《The Dictator: Wadiyan Games》

有睇過「波叔」新作《The Dictator: Wadiyan》（大鈍裁者）電影預告片，都知道今集「波叔」扮完Ali G、哈薩克記者以及同志潮人後又一新搞作，預告片中有搞笑一幕：參加100米賽跑時既自己拎起步槍起跑，兼且開槍射其他參加者同裁判，原來喺手機遊戲中都會重現！

身為一國之君的Aladeen將軍，在遊戲入面就抽取搞笑但又好諷刺的運動情節，要在跑步、游泳、劍擊同拳擊四項運動之中打敗對手贏冠軍。好似賽跑方面唔係鬥跑得快，而係要將跑在你前面的跑手做低，Heat 1都只係拎手槍，到Heat 2已用機關槍，到Heat 3更揸埋房車兼且射飛彈。拳擊比賽又係得你打，人哋打唔到你，只要跟住對手身上的黃色鏢靶出拳就搞掂，又係一Round比一Round誇張。每項運動都係你自己話晒事，可玩性確實唔高，但係有「波叔」親身配音，玩落又幾開懷嘅！

系統：Android 2.01

下載費用：免費

Hot Picks：自拍上網《Socialcam Video Camera》

《Instagram》多人玩兼且引埋Facebook高價收購，自然多人學佢哋嘅成功方程頗式。《Socialcam》玩法都似，但就將影相變成拍片，送上Kodak、1970's、Rouge、Electronica、Bleach、Vice、Noire、Grunge、Action等多個濾鏡，拍完後仲可直上Facebook或Twitter同朋友分享。

系統：iOS 4.3

下載費用：免費

睇波吹水《Euro 2012 By FootyTwits》

歐聯已經煞科，歐國盃好快就開鑼！老實講開波時間又係凌晨兩點幾，好難晚晚都出去同班朋友吹水睇波，用呢個App就可以邊睇邊同波友吹水，兼且唔使捧住部電腦咁重添。

系統：Android 2.1

下載費用：免費

影癡必備《Festival de Cannes-Official》

又唔使着到花枝招展行紅地氈博記者影相嘅！透過呢個康城影展官方App《Festival de Cannes-Official》就可以好似身歷其境咁去咗康城，收睇第一手影展相片、訪問、電影預告片，甚至是聽埋記者會上的錄音片段，影癡們大可趁今個星期日閉幕前追番影展的相關消息！

系統：iOS 4.0

下載費用：免費

藍血足球《Pepsi Football》

汽水公司旗下的足球App，當然以贊助嘅球星做宣傳，等大家一邊睇球星的獨家廣告、音樂、訪問、靚相兼玩遊戲，變身成「藍血人」。「藍血」球星方面都猛料，既有美斯、王子費托外，仲有新鮮滾熱辣係人都想捕捉他的杜奧巴。

系統：Android 2.2

下載費用：免費