《Dragon's Dogma》西洋妖怪大舉出動

雖然《Dragon's Dogma》驟眼睇真係好易令人聯想到係西洋版《Monster Hunter》，但其實兩者由角色設定到系統都有好大分別，尤其係Pawn士兵系統可以操起士兵，再租畀其他玩家出戰，確實別具一格。同樣拎各式武器打怪，《Dragon's Dogma》就唔玩屠龍，而係打西洋神話中的巨大怪物，仍然好有快感，似乎只係差在唔可以好似「芒亨」咁約埋朋友一齊連線打怪而已！

中古神話為藍本

《Dragon's Dogma》的人物同怪物設計，以至場景設計都好有西洋味，但其實本作徹頭徹尾係日本出品，只係之前做足晒資料搜集，將西洋經典的妖魔鬼怪共冶一爐，好似經典九頭蛇、獅鷲到哥布林都變成遊戲中嘅頭目，論親切程度自然勝過憑空想像嘅龍類。始終「芒亨」珠玉在前，類型接近嘅遊戲都難免會用嚟比較，但係《Dragon's Dogma》在架構同系統上都有好明顯嘅唔同，故事性亦較強，以被飛龍奪走心臟的戰士玩家在中古世紀歐洲開放式世界的冒險做主軸；當然，玩家如果對歐洲神話有多啲認識，自然玩得更投入。

訓練士兵賺大錢

《Monster Hunter》最令人着迷係可以4個玩家連線出征屠龍，《Dragon's Dogma》就反而設計咗Pawn士兵系統聯合線上玩家。遊戲入面同樣係以4人小隊模式出戰，除咗玩家自己創造的角色之外，仲要帶多3名Pawn士兵出戰。其中一個Pawn士兵係玩家在遊戲開始前所設定，全程無得輪換，但亦係玩家嘅最大資產，因為玩家可以將佢出租賺水晶，再從其他玩家處請來多兩位Pawn士兵幫手，而呢兩位Pawn士兵就更可以因應唔同場合隨時更換。想其他玩家租用你嘅士兵，就要諗計操起佢，到底會練成全能型抑或偏重某些技能，就睇各人嘅喜好，只要全程唔轉職業，其實可以訓練出偏重某些技能的士兵。不過要一提，相比RPG或其他同級嘅遊戲嚟講，遊戲的職業系統變化唔算好多，由最初的鬥士、急行者同法師3種職業，到最多都只係變化到9種職業，有啲唔夠喉。

送《RE6》試玩版下載碼

本作戰鬥系統做到足，可用劍或大刀劈巨怪，亦可用埋弓箭射飛行類巨怪，亦要爬上巨怪身上攻擊，諗得到嘅都差唔多全做得到。但筆者就更欣賞怪物設計，大部分都有根有據，好似希臘神話中的獅鷲同九頭蛇，或者歐洲民間傳說嘅哥布林，睇落反而似《Lord of the Ring》。九頭蛇身形大得誇張，仲有幾條連上血盆大口的長頸探頭攻擊，就算斬去蛇頭都可以重生；而獅鷲可在空中俯衝，利用尖喙同利爪攻擊，唔用晒成支小隊的力量，係無可能打得過佢。至於好似《Lord of the Ring》咕嚕的哥布林就成群出動，亦一啲都唔好惹。而遊戲出場嘅怪物更多達八、九十種之多，要因應每一類怪物的弱點進行攻擊，更要作出指示隊友幫助攻擊，相當刺激。順帶一提，《Dragon's Dogma》仲會有埋年底推出《Resident Evil 6》的試玩版下載碼，Xbox 360版7月就有得下載，PS3版就要9月先有！

INFO

類型：動作

開發：Capcom

平台：Xbox 360、PS3

推出日期：今日

售價：$328

查詢：2366 1001