《Ghost Recon Future Soldier》未來報告體感砌槍
呢個5月對機迷嚟講真係一番掙扎，既有神作《Diablo III》同《Max Payne 3》，今個禮拜再嚟多隻《Ghost Recon Future Soldier》，一日有48小時都唔夠玩。言歸正傳，今集《Ghost Recon Future Soldier》都有唔少高科技裝備可玩，例如識得隱身嘅光學迷彩戰衣，玩潛入就至啱，仲可以Call埋其他隊友同時間開槍轟敵人添！如果大家係槍癡的話，仲可以用體感方法改槍，Download落智能手機或Tablet出街砌添！
光學迷彩衫變隱形
《Ghost Recon Future Soldier》講明係未來士兵，當然要有高科技傍身先似樣，其中最出位要算係光學迷彩軍服，遠睇同一般軍服無乜分別，但只要一撳掣，兩、三秒內就可以隱身，玩潛入就一流。呢件光學迷彩軍服使用時並無時間限制，但又未至於無敵，開動隱身功能後，只可用正常步伐前進，而且唔能夠開火，當太過接近敵人，譬如三、四米距離，玩家再唔係「你睇我唔到」嘅狀態，但識得兜路走從後突襲嘅話，就真係好好用！而且玩家小隊嘅三名富經驗隊員都幫到手，全都訓練有素，唔會貿貿然出手。
同步開槍兼打50波
今集再導入一個嶄新同時開槍嘅系統，可以由玩家做Leader落命令，指令自己同幾位隊員對準唔同目標同時開火，好似第一關已經有一幕要同一時間做低脅持人質嘅四名恐怖分子，如果單人匹馬執行任務必死無疑。另外今集都有得玩Cross-com呢款戰場通訊裝置，戴住佢就可以直接於護目鏡上睇晒即場戰場情報，邊個區域有埋伏同距離目標物有幾遠都一目了然，夠晒高科技。《Ghost Recon Future Soldier》場景設計亦別出心裁，由沙塵滾滾嘅非洲沙漠打軍閥，一直打到去莫斯科同北極，而今集劇情模式共收錄八個場景下嘅12個任務，唔止可以單人慢慢煲，亦可以聯合三名玩家隊友一齊挑戰12個任務，仲有得玩埋「50波」游擊模式，爽！
超大量槍械Parts任砌
武器系統亦係今集一大賣點，Gunsmith模式就可以畀玩家自己改槍，可選擇幾十種突擊步槍、手槍、霰彈槍、衝鋒槍，由扳機、槍管至槍托都有得畀大家改裝，總共可以砌出超過2,000萬種武器組合，真係有排玩。而且今次Gunsmith更支援體感操控，Xbox 360版配Kinect就可以扮成《未來報告》咁手指指改槍；PS3版就要配Move手掣，改完後仲可即刻到練靶場試吓支槍嘅特性。嫌對住電視或電腦芒改槍靈活性低，廠方仲推出埋「Ghost Recon Network」，可以透過iOS或Android App在智能手機同Tablet上改槍兼Check即時戰績添！至於多人戰模式都有唔錯表現，之前就有得公開試玩，支援到12人六對六作戰，可以自由選擇步兵、工程師或偵察兵三個兵種出戰，有四種模式及10張地圖可玩，其中更包括系列經典嘅「Siege」圍城模式，都算係交足功課！
INFO
類 型：第三身射擊
開 發：Ubisoft Paris
平 台：PS3、Xbox 360
推出日期：已推出
售 價：$388（PS3） $359（Xbox 360）
查 詢：2359 7998
PS3版本
Xbox 360 版本
夜視系統下，邊度有敵人埋伏都逃唔過玩家雙眼。
遊戲着重團隊精神，要聯同隊友一齊解決恐怖分子。
就係呢個場景，要連同隊友一齊開槍做低恐怖分子救人質。
機場上開槍係少有嘅設計。
任務多元化，由沙漠、極地到城市戰都有。
從後突襲係Ghost Recon嘅精髓所在。
一撳啟動掣，光學迷彩戰衣會由下向上逐步隱形。
透過體感操作直接拆槍改槍，Gimmick多於一切。
今集新引入「Ghost Recon Network」系統，可用智能手機或Tablet改槍或睇即時戰果。