《Resistance: Burning Skies》消防員打外星怪

幾代PS3版嘅《Resistance》都係成班軍人打外星怪物，在PSV登場的新作《Resistance: Burning Skies》就決定搞搞新意思，主角唔再係軍人，而係消防員！消防員打外星怪物都得？開發公司話係以市民嘅觀點去睇外星怪物襲地球嘅戰事，唔理真定假都好，角色設計都幾特別，並且可以用上PS Vita嘅觸控式操作，能夠直篤畫面鎖定怪物或者直接揀選副武器，玩落都有新鮮感！

揸斧頭變揸槍

《Resistance》系列係講上世紀四、五十年代Lo-tech時空上打外星怪物，PSV版《Resistance: Burning Skies》都唔例外，時間大概係處於PS3版第二集至第三集之間的時空，講述主角消防員救救吓火撞正外星生物襲地球，既要救火、救家人更要救埋地球，都好似荷里活片的橋段。橋段雖然唔算石破天驚，但見主角開頭由拎斧頭負責清除火場嘅雜物，到變成拎起重型武器打外星生物「奇美拉」，過程都幾有趣！

輕觸操控揀武器

以往在手提機玩射擊遊戲都唔太順手，PS Vita好在設左右Analog掣，要移動同瞄準都較方向掣容易，而且遊戲亦活用PS Vita的觸控畫面功能，只要篤住畫面上的怪物即可鎖定目標，開槍後子彈更識得轉彎，自動導航擊中怪物。除主武器槍械之外，大家亦可直接在畫面上點選斧頭跟手榴彈等副武器，同樣易上手。今集登場嘅武器有部分承襲自家用版，不過無論係新或舊武器都以PS Vita觸控操控方法改良，譬如加入觸控上彈功能，係手提版先做得到。PSV版一樣提供多人連線對戰模式，人數雖然同家用版爭好遠，但做到8人對戰都算交足功課！

INFO

類型：射擊

開發：Nihilistic

平台：PS Vita

推出日期：5月29日

售價：$298

查詢：2341 2356