百萬投資茶餐廳 小炒至冧客
租貴、成本貴，食店經營不易。要發圍，不可一味靠慳，反而落足本錢，事事做到最好才有回頭客。就像荔枝角這間新開張走高檔路線、斥資百萬的茶餐廳小廚港作，門面四正又光鮮，環境舒適吃得安樂；水滾茶靚之餘，其小炒更是鑊氣十足，香噴噴，難怪開業不久，已贏盡附近上班的一眾白領口碑。
話說小廚港作的老闆馬先生醉心飲食業，搞紅酒生意之餘，去年在重慶開設了首間小廚港作，生意不俗，遂回流香港開分店。店子落戶荔枝角，全因為租金比傳統旺區平，加上馬先生發現該區缺少環境四正的高檔茶記，而這類食店正是上班族喜歡光顧的，於是便投資七位數字開店。
菜式貴精不貴多
雖說是茶餐廳，不過小廚港作對食物的要求絕不馬虎，請來當主廚二十多年的許師傅把關，許師傅熟悉茶餐廳的粉麵輕食，港式小炒亦難不倒他！餐廳經理朱先生表示，不租旺區所省下來的租金，可全投放在食材之上，用優質材料做菜。開業初期，菜式貴精不貴多，例如小炒只有16款，但極其着重品質，希望先做出口碑，以後才給予食客更多選擇；像招牌生啫煲的秘製醬汁，就是由許師傅親自研製，用上桂林辣椒醬和甘草等七種材料調製而成，再加上大量乾葱、蒜和薑來爆香，味道香辣惹味，而且烹調手法正宗，原材料落煲生啫煮熟，絕非坊間那貪快的煮法，預先煮好一鍋，才用沙煲盛起上桌而已。
真材實料花心機
餐廳小炒做得出色，傳統茶餐廳的食物也是講求真材實料；單是招牌鮮茄牛腩粒湯通粉的番茄湯底，就用上近20斤番茄和20斤洋葱，還有甘筍、薯仔和牛腩粒，熬上6至7小時而成。師傅更會預先一日製作，務求熬至入味，火候更十足，一入口滿是番茄的鮮甜味，相當醒胃。
Shop Info
小廚港作
地址：荔枝角長沙灣廣場地下G01B號舖
電話： 3105 0618
馬老闆炒飯$41
一看就知是老闆愛吃的菜式。許師傅想出用蠔油、豉油，配花枝片、鮮蝦和帶子來炒飯，蠔油的濃香令海鮮的鮮味更突出。
生啫鮮蝦伊麵煲$62
選用沙地蝦，肉質爽口鮮甜，伊麵吸收了鮮蝦的精華，帶陣陣蝦膏的味道，還帶微辣，十分惹味。
馬拉提督鹽香雞$52/半隻，$98/隻
選用大隻冰鮮雞，先用鹽水浸熟，再浸冰水，令雞皮變得爽口，然後浸白滷水至入味，約需時3小時，難怪雞肉極嫩滑。
原煲招牌咖喱牛腩$45
咖喱是葡式製法，但加以改良，用上大量洋葱、乾葱和香料，質感濃稠，味道偏辣，牛腩則腍身得來帶咬口感。
澳門豬扒包$19
亮點在於配豬扒包的醬汁，賣相似沙律醬，不過卻是用煉奶調製而成，味道不會太酸，且帶甜香。
醬爆豬頸肉$49
豬頸肉切條，比切片處理更爽口，用豆瓣醬等調味料，加上青椒和洋葱等佐料同炒，像回鍋肉般惹味。
招牌鮮茄牛腩粒湯通粉$18
番茄味濃郁，酸而不澀，用上牛腩粒，比港式羅宋湯有過之而無不及，甚為開胃。
瓦煲特地挑選尺寸偏大的款式，以盛載多些食物。煲身不太厚，卻十分保溫，食物不易變涼。
店面窗明几淨，卡座闊落，就算是繁忙時間，也不會逼狹。