日本製 和味濃 Fujitsu Lifebook LH772
曾幾何時，Fujitsu與「S」記，都是標榜日本製造的品牌，不過時移勢易，加上日圓高企，呢兩個牌子唔少型號都已經在內地製造，而坊間不少人認為轉咗產地之後，好像削減了信心。Fujitsu Lifebook LH722終於回歸日本生產，不單造工好咗，成個外形當堂靚仔晒，鍵盤同外殼經過重新設計，有型又實用，加上今次重點係雙「橋」殺到，首次內置Onkyo喇叭和採用「長春藤橋」Ivy Bridge規格，絕冇失禮「日本製」呢個招牌。
鍵盤幻彩設計
今次Fujitsu把LH7XX系列搬回日本製造，可算係重點回歸，雖然因為產地轉變令機體的定價稍微調升，不過機體的新設計卻絕對值回票價！外形沿襲了上代LH701的貴氣風格，但外殼更趨流線型，令人看得賞心悅目。而鍵盤方面亦下了一番苦功，除了獨一無二的F-Line設計外，亦把鍵盤重新排列，令其成為罕有具備數字鍵盤的14吋機種，而鍵盤每粒掣都採雙色幻彩設計，驟眼睇好似有背光效果，加上Palmrest位置更有立體花紋，同上代比，LH772真係有誠意得多。
雙「橋」吸引力
講起Ivy Bridge，Fujitsu並唔係第一間推出新規格Notebook嘅品牌，而且日系機因為成本問題，好難在規格方面再進一步。因此Fujitsu Lifebook LH772不單採用Ivy Bridge處理器，亦有NVIDIA GeForce GT 640M LE獨顯，令佢無論係睇戲或者打機都能夠應付得到。除Ivy Bridge「長春藤橋」之外，LH772尚有一「橋」來增加吸引力，就係首次加入Fujitsu Notebook大家庭嘅Onkyo喇叭，同一般內置喇叭唔同，佢嘅音盆部分比普通喇叭細緻得多，亦加入低音反射通道來增強低頻表現，配合埋預載嘅DTS UltraPC II Plus優化軟件，邊個話Notebook冇靚聲？
全USB 3.0介面
新平台還有一個惠及機體的地方，就係具備原生USB 3.0，令Fujitsu Lifebook LH772成為首款所有USB介面均屬3.0規格的機款，而且其中一個更可以設定成具關機充電功能，方便用家可以隨時為數碼產品以USB充電，可以話係非常體貼。不單如此，LH772仲有個專為戲迷而設嘅Face Sense面部感應軟件，只要啟用此功能，當用家睇緊戲時離開電腦，就會自動暫停兼熄芒，雖然呢個功能一定要駁火牛先用得，不過感覺仍然相當新鮮。所以話，日本機就係憑藉一分體貼心意，再加上精細造工，令你覺得就算貴，都係值得。
SPEC
處理器：Intel Core i7-3612QM 2.1GHz（Turbo Boost 3.1GHz）
記憶體：4GB DDR3
硬碟機：750GB SATA
光碟機：DVD Super Multi DL
顯示：NVIDIA GeForce GT 640M LE
屏幕：14吋SuperFine HD w/LED Backlit （1,366×768解像度）
作業系統：Windows 7 Professional
無線技術：802.11n、Bluetooth 4.0
尺寸：345×242.1×35.5mm
重量：2.18kg
各$13,980（另有i3版本，售$9,998）
眼見各牌子均與音響品牌合作，Fujitsu今次亦加入Onkyo喇叭，在聲效上作出突破。
獨有F-Line設計同重新排列嘅鍵盤，就算14吋機款加入數字鍵盤都唔覺逼。
指紋掃描加上圓形捲軸設計，令TouchPad睇落與眾不同。
Palmrest位置加入立體花紋，外觀一啲都唔單調。
屏幕採取全平面設計，令LH722望落更一體化。
機身全部USB都是3.0制式，而且更可設定其中一個具關機充電功能。
DVD光碟機喺14吋機上都算係必然規格，有埋光碟機都係得2.18kg，唔算重。
機身具讀卡器同Wi-Fi開關，方便過相，又可隨時熄Wi-Fi慳電。
配備極大容量的6 Cell電池，機背還有HDMI介面。
機身各個部分可拆卸底蓋方便升級，而且還有散熱皮革設計，甚高貴。
和一元硬幣相比，可看出LH772其實也具一定厚度。
Face Sense軟件可在用家睇戲時離機熄芒，就算唔記得按暫停都無問題啦。
在Windows評分中，以處理器分數最高，有7.5分，是暫時Notebook中最高效能的機款。
以DTS UltraPC II Plus優化軟件加強音色，配合內置Onkyo喇叭就更相得益彰。
試片區
播放《Men in Black 3》電影預告，顏色表現優異，不愧為日系機種，其飽和度十分高，而且色準不錯，加埋上佳音色，當流動影院用絕對稱職。