繽Fun噓噓樂

屎尿屁永遠有Market！唔好誤會，我唔係講啲電影呀！世界各地有唔少餐廳同酒吧老闆都喺度打廁所主意，勁花心思將廁所變成一個有趣嘅噓噓樂園。其中英國倫敦南部Balham區就有間酒吧喺男廁安裝咗個屎坑電玩系統，大家可以透過連接尿兜上嘅12吋高清屏幕同尿兜內嘅高科技感應器，靠噓噓嘅左右方向同力度打機。最重要係得分可直接Upload上Twitter或Facebook同朋友分享，真係要畀個Like佢！

以形補形

有次去馬來西亞至出名嘅潛水勝地樂浪島玩水，我哋個潛水教練話要Show Off啲嘢畀大家睇，見佢往下一摷，終於撈咗碌黑黑實實、成呎長嘅物體上嚟……哦！原來係海參，海參一上水就立即變得硬繃繃，而潛水教練仲作狀想食咗佢，笑騎騎話以形補形喎！

鞋口鞋面

相信大家去Shopping時都試過遇上態度惡劣嘅售貨員，畀錢佢賺仲要睇佢面色，火滾！不過凡事總有例外，上次喺韓國首爾明洞購物區，小記就遇上兩位「鞋口鞋面」嘅女售貨員，不過卻令人相當受落。原來當日係鞋店開張，所以兩人特別戴上鞋形面罩搞宣傳，完美示範如何「鞋口鞋面」而不失可愛。

羅密歐與茱麗切

小記喺意大利一間舖頭見到呢本「書」，霎眼以為係《羅密歐與茱麗葉》（Romeo and Juliet）嘅木皮精裝版，拎上手先知唔對路，書面上原來寫住「羅密歐與茱麗切」（Romeo and Julienne）！山寨A貨定係串錯字呢？其實佢係不折不扣一塊實木書形砧板，大玩食字之餘，仲將文學氣息帶入廚房，包你阿媽都讚好呀！

新潮婆婆

話說三月去咗巴黎時裝周，吸引我眼球嘅，除咗法國嘅古舊建築物之外，當然仲有處處都係嘅靚人靚衫。咁究竟有幾靚呢？有日坐地鐵，就遇上呢位新潮婆婆，年紀雖大，但係一身斑點Look打扮，就拍得住時下潮人，我不忘偷影留念之餘，仲想大叫一聲：「婆婆！你好潮！」不過，法文點講呢？

估吓邊個住喺度？

Q太郎、老夫子、Mr. Bean、麥當當叔叔呢啲人物有個共通點，就係朝早起身唔使煩、唔使揀着乜衫出門口。而上述嘅人物，並非虛構出嚟，佢哋真實存在，仲畀我發現原來住喺西環！唔信？你睇吓邊個住喺度？（貼士：此君對漢堡包情有獨鍾。）