《Starhawk》射擊+RTS玩法傷腦筋

4年前推出嘅《Warhawk》並唔算「大作」，但可用PS3無線手掣六軸操控戰機同裝甲，就令大家留下深刻印象。下星期推出的《Starhawk》理論上唔屬於《Warhawk》續集，不過玩法仍以第三身射擊為主，舊有Fans仍可感受到遊戲嘅刺激氣氛；但為咗吸納更多新Fans，今集加入咗「Build n' Battle」玩法，即係在射擊遊戲上加上RTS即時策略元素，在近期缺乏射擊大作下推出，都值得一玩！

建築物幾秒即落成

早十年八年，RTS即時策略遊戲仍可獨當一面；今時今日，射擊遊戲卻雄霸遊戲界。不過要為射擊遊戲加添新元素，RTS元素開始又滲透到各個射擊遊戲中，《Starhawk》便是其一。RTS基本玩法係透過蒐集資源，再運用資源建造建築物或生產武器，講求策略性，但套用落分秒必爭嘅射擊遊戲似乎唔太適合，所以《Starhawk》嘅「Build n' Battle」建造與戰鬥玩法就簡化咗好多，只要有足夠資源就可以興建建築物及生產武器，下達咗命令後只需隔幾秒，成棟建築物會從天而降，唔使好似真正RTS遊戲咁要等好耐先建成。

搶奪資源成關鍵

《Starhawk》故事背景係講搶奪資源，設定在未來外太空星球之上，其中一個名為「塵星」嘅星球就蘊含大量貴重能源，但人類會被呢種能源感染而突變成異能種族，可是為咗生存，要繼續發掘這種能源，仲要同另一班同樣要搶資源嘅外星種族對抗。《Starhawk》另一改進之處係加入《Warhawk》所冇嘅單人故事模式，透過扮演主角艾梅特．葛雷夫呢個受能源污染而變得擁有超人力量嘅軍人，去同外星種族死戰。能源喺本遊戲嚟講係相當重要，不過只要喺重生點附近，就可以慢慢蒐集得到；如果擊倒敵軍又或者喺地圖上的能源桶都可以獲得部分能源，然後可留作興建之用。

善用載具克敵

可以興建得到嘅建築物或者武器都幾多元化，譬如可以興建攻擊敵方士兵的「自動機槍台」、保障己方的「防衞牆」、設置重生點的「前哨站」或者各種載具。但要留意，就算有無限能源都好，興建建築物數目係有限制，當數目到Quota時，就要拆毀其他建築物先可以再起。生產適用嘅載具係致勝關鍵，例如自己行慢吞吞兼容易受襲，生產架響尾蛇噴射機車就可高速遊走戰場，玩連線模式深入敵陣搶旗仔就更有效。另一有趣設計係可以生產噴射背包，着上身後連步兵都可以進行空中攻擊，感覺都幾有型！連線模式可以支援32人連線對戰，之前公開測試時，玩家普遍反應都唔錯，亦可以靠累積經驗值提升技能，以及改變角色同載具外觀添！

INFO

類型：第三身射擊

開發：LightBox Interactive / SCE

平台：PS3

推出日期：5月8日

售價：$388

查詢：2341 2356