Dining Out：豐儉由人母親節餐
又到五月天，媽咪大晒，今年你會帶母親大人到哪裏食大餐？小記就鎖定了灣仔皇后大道東的The East，那裏多間食肆如W28、Oyster Bar & Grill、Zummer、La Cucina Italiana等均會推出母親節美食及套餐。其中最吸引的，莫過於秋田鐵板燒專門店的「松阪四人前套餐」，用上頂級食材，如活伊勢龍蝦、原隻鮮活澳洲大鮑魚、A5松阪霜降神牛等，並由鐵板燒師傅即席烹調，為客人帶來視覺和味覺的雙重享受。若然媽咪是貪靚潮媽，提議你幫襯八番拉麵推出的母親節套餐，有大熱叉燒豬骨湯拉麵、經典烏賊天婦羅和清新豆乳布甸，輕巧但不馬虎，包保媽咪話「和味」。值得一提的是，於The East消費滿$500，可獲贈總值$79的湯包一份，讓你帶回家煲靚湯畀媽咪保健養生，做個孝順仔女。
查詢：2527 7292
松阪四人前套餐 $888/位（6道菜）
秋田的鐵板燒師傅揮灑自如地在鐵板上寫出各式字句或圖案，充滿娛樂性。
八番拉麵 母親節套餐 $79
慶祝母親節不一定次次大魚大肉，細食媽咪相信會喜愛這個輕怡套餐。
湯包分「猴頭菇石斛湯」和「猴頭菇鯊魚骨響螺湯」兩款，都是滋補靚料。