《Prototype 2》改造人追殺舊主角

只要主角仍然有人氣，唔少遊戲都好樂意長出系列作，正如《Tomb Raider》時代嘅Lara Croft同近期《Uncharted》Nathan Drake。不過以變形瘋狂殺戮起家嘅《Prototype》，到第二集就打破常規，新主角雖然繼承咗上集主角嘅變形能力，要變出長鞭、大刀、利爪等武器話咁易，但最終任務竟然係要做低上集主角！筆者Buy佢嘅血腥華麗風格外，更Buy這種不按牌理出牌嘅設定！

為報仇被迫出山

要了解故事所講嘅兩代恩怨情仇，就要花多少少筆墨。話說3年前推出嘅開放式動作遊戲《Prototype》講述失去記憶嘅基因改造人Alex Mercer，在紐約以殺戮去尋找過去，並揭破當中陰謀。遊戲最大賣點係主角身體可以變形，變出各式各樣武器，以華麗動作招式大肆殺戮。到第二集《Prototype 2》主角就換上退役軍人Sgt. James Heller，佢老婆同個女都因為感染Alex Mercer所散播嘅Blacklight病毒而死，於是佢決定出山加入軍方拯救受感染病人，點知成隊戰友都唔好彩受感染而死，得番Sgt. James Heller單打獨鬥，要搵Alex Mercer算帳！

變形招式夠誇張

要貫徹《Prototype》嘅變形風格，新主角James Heller都要經過基因改造先得，所以劇情特別安排Alex Mercer睇得起James在疫症潮中竟然有免疫能力，將佢改造成改造人，諗住幫自己手，但係James復仇心切，大搞破壞，仲要搵出幕後元兇Alex Mercer。James嘅變形能力都幾誇張，可以用前臂變成盾牌，利爪、巨型刀刃、錐形拳頭、荊棘長鞭等，由長距離攻擊武器、短距離武器到防禦武器都有，難以一一盡錄，隨住在遊戲中升級、解鎖新技能同組合出獨家技能，變形招式可以千變萬化。

開放式設計血肉橫飛

遊戲會以開放式玩法設計，即係有主線劇情之外，仲有好多支線任務可以玩，透過進入機密電腦網絡Blacknet就可睇晒全城嘅軍事資料，可以在網絡內接任務以提升角色嘅變形能力。遊戲版圖都係分為三區嘅NYZ，分別係戒備森嚴嘅軍事綠區、難民營嘅黃區同完全受病毒感染嘅紅區。但邊度係NYZ？其實所指係New York Zero，即受到破壞而變得面目全非嘅紐約。街景設計都幾有大都市Feel，不過無乜底線同包袱嘅《Prototype》系列最引人入勝之處係打到甩手甩腳、血花四濺同內臟亂飛，至於最後新舊主角大戰會搞成點，大家自己體驗吧！

Info

類型：動作

開發：Radical Entertainment

平台：PS3、Xbox 360

推出日期：已推出

售價：$399

查詢：2418 8896