4人幫9個月歐亞長征

如果係咁就好啦！如果可以咁咁咁，就可以咁咁咁啦！如果命運能選擇……

試問人生有幾多個如果呢？自問年屆中女，早已睇化晒，唔多唔少都變得保守不敢嘗試。不過，4位熱血小伙子，就對生命充滿希望，放下手上一切，踏着單車，攜手由香港直踩法國。

4個大男孩本來各不相干，何以忽發奇想，決定腳踏單車歐亞長征呢？4種性格如何在旅程中磨合，安然完成歷時9個月的旅程？一切未知數難以預測，但這一刻看得見的，是4人對夢想的堅持與期盼！

夢想，話遠唔遠，話近唔近，但正因為夢想，把4個毫無瓜葛的後生仔連繫在一起。4個大男孩羅業閔（Hotkiss）、鍾泰來（Taylor）、黃梓健（Prince）及余天宇（Tim），年齡層介乎22至26歲，屬於搏殺期，本應努力工作、奮鬥搵錢。然而，4人為着同一個夢，沒有被生活擊倒，促成今次「Bike For Another Choice」旅程。

人人都希望實現理想，但不是個個有膽量。本來只得Hotkiss一人有此行程計劃，接着好友泰來加入，後來想申請工作假期到澳洲的Prince，得悉二人的概念後，也決定摻一腿，最意想不到是電視劇《天與地》也有份促成好事。「套劇講生活和理想，加埋首歌提及的命運選擇，激發我們有實現夢想的想法，我覺得好多事情都可以自己揀。」Prince說。至於阿Tim則更加敢作敢為，以陌生人的身份，主動聯絡他們仨，最後一拍即合，一同實現踩單車勇闖異地壯舉。

抓緊機會 追尋夢想

每個人都有不同價值觀，換個角度看，意義依然存在。9個月時間，對於物質主義的都市人何其重要，何不用盡分秒揾真銀？幾位年輕人捨棄現職，從香港騎單車到法國，值得嗎？

Hotkiss說：「有好多人一畢業就搵工，唔係話唔好，只不過我哋覺得可以有另一種生活方式。」Prince直言：「好多人話80後唔捱得，不能面對失敗，今次可以當一個機會證明畀人睇，有夢想就可以勇往直前！這是我們的另一種選擇，其實社會是否一定要如此單一，不容許有其他想法呢？」Hotkiss補充：「人生有幾十年可以用來返工，依家唔做可能一世都唔會做，不如趁自己未有太大包袱，想做就去做！你點知我一定失多過得？可能我得到的比留在香港打工更多呢?!」阿Tim是團隊中年紀最大的一位，閱歷多一點，體會更深：「其實用自己努力去實現夢想有何不妥？與其日日朝九晚五浪費人生，倒不如用時間去體驗更多不同事物。」

宣揚環保 享受風光

幾個大男孩，選擇了另一種生活方式，更選擇了以單車作為交通工具，他們不約而同地說，在很多國家，以單車代步已發展得十分成熟，只是香港仍然把它視為消閒活動，故他們希望透過此行推行環保訊息。誠然，以人腳來推動的單車，相對以電油等推動的飛機、汽車等，對大自然的損害較少，Tim解釋：「踩單車可以減少燃油使用，減少碳排放，絕對是環保交通工具。當然好多人會認為旅行搭飛機快捷方便，但其實路途上可能錯失不少美麗風光，踩單車旅行，可以控制節奏，沿途可感受更多不一樣的風光，漫遊探索，是另一種旅行的體驗。」

至於何以選擇直踩巴黎？Hotkiss為此解說：「其實這個行程可以說是向前人致敬，之前見過一位台灣人Deray為了環保，隻身由北京踩單車到巴黎，藉此引人反思環保，跟我們的理念相同，因此我們同樣踩單車到巴黎，向他致敬。」

由香港踩至巴黎，行程足足9個月，相信家人必定有反響。Prince說：「當初家人認為我們做的事不切實際，反對聲音很大，但後來見我們有實際行動，有計劃又得到媒體報道，心態開始轉變，媽媽更決定為我吃一年齋，替我祈福，希望旅程順利。」

考意志力 堅持到底

預計的9個月旅程，日日踩8個鐘，約100公里，的確唔係小兒科，正如沒有做開運動的Tim，對行程或多或少有些影響，但Hotkiss認為旅程非比賽，體力不是最大問題，遇上體力不繼最多放慢來踩，最重要的是意志力，「這對我們來說也是一大挑戰！」

10隻手指有長短，何況4個背景完全不同的人呢？大半年相處，如何解決途中的爭拗不和？會不會擔心有人拂袖而去？他們異口同聲說：「不會！出發前已經約定，即使中途出現不和，大家也要堅持完成旅程，準備多時，無理由咁易放棄。」Prince說：「自己性格比較火爆，情緒起伏較大，可能見隊友踩得慢都會鬧交，但點都好，如有任何不滿都會直接說出來，說了自然解決到。」寄望他們能帶着滿滿的幸福及體驗回港，祝一路平安！

Profiles：羅業閔（Hotkiss）

活動發起人，24歲嘅佢本身係地盤管工。因業閔發音與熱吻相近，因此英文名叫做Hotkiss（其實都幾摟打）。唔知係咪因為咁，所以想踩着單車去法國，享受一下法式濕吻呢？

黃梓健（Prince）

人如其名，舉動都幾王子，不時會擺出Chok樣。22歲的他是一名歷奇教練，今次親身參加一次長征歷奇，相信對日後工作大有幫助吧！

余天宇（Tim）

26歲，是4人之中年紀最大的一位，從事工料測量，在網上發現此活動後，心想：「依家唔做等幾時？」，於是決定跟隨其餘3人，遠征法國之旅。

鍾泰來

正修讀香港城市大學政治及行政管理學士課程Year 3，是Hotkiss同Prince的Common Friend，因為一次無心插柳，促成兩人見面，一拍即合。

後記：誰是家明？

記得最初約業閔做訪問，他竟說自己已做了幾次訪問，甚麼理念、行程等，都已說過數遍，又已上載至網頁云云，問我可否有新意一點的問題。我當堂被激到生蝦咁跳，既然他們言論大膽，也不妨來點搞鬼問答：

記：你們被《天與地》打動，又剛好組成4人組，如果行程中遇意外，會否吃了其中一人？

王子搶答：阿Tim啦，佢最遲加入嘛！講笑啫，相信不會有去到要食人嘅情況出現嘅。

業閔：其實《天與地》都係講理想同生活，食人絕對唔會做。不過，如果真係去到咁嚴峻，都唔排除呢個可能，到時就睇下邊個唔好彩啦！哈哈！

訪問當日，其中一位成員泰來沒有出席，係咪早已被佢哋3個吃掉？實情係當日他要準備畢業習作，搞到三缺一。也對的，即將遠征大半年，好應該先完成學業，再好好上路。

想了解多啲Bike For Another Choice的最新動向，可以留意佢哋嘅Facebook：www.facebook.com/BIKEFAC