聲控開機Smart TV有新意

講「Hi TV，開機！」就會自動開機，原來2012年新款電視可以神奇到咁！Samsung今年度旗艦級3D Smart TV ES8000系列新增聲控功能，對住電視或智能遙控講話，就可以控制電視開機、選台和調校音量，好玩到震！得聲控一招咁少？當然唔止，仲有埋體感操控、視像辨識等前所未有的操控新功能，加上5mm超幼邊框、超靚畫面、雙核處理器、可插模組升級等等，真係大超班！

5mm超幼邊框　畫質超強

提起幼邊，以前多數係啲細廠搞吓花臣來聲東擊西，掩飾質素上的缺點，但去到好似Samsung ES8000系列，無論設計、功能同質素唔止拋離二三線廠商好遠，就算同級對手暫時都未有得鬥。ES8000系列靚盡同儕，55吋大畫面只用上一條5mm的超幼邊框，遠睇唔覺眼，而且機頂更內置「微型」視像鏡頭，玩埋Skype都得。電視機配備雙核處理器，用上Micro Dimming Ultimate技術可顯示超高對比同超細緻嘅畫面，仲支援800Hz CMR流暢倍增技術，顯示3D高速畫面時都唔覺有殘影！此系列先推出55吋，65吋將稍後面世。

講「Hi TV！開機」即着

講到最好玩，都係聲控功能，可以直接用廣東話同ES8000系列Smart TV溝通。只要對住電視講句「Hi TV！開機！」就會着機，講「大聲」或「細聲」就會調高或調低音量，講「下一台」就會自動跳台，講「訊號」就會幫你進入訊源目錄，細路仔同老人家都唔使怕唔識撳遙控。不過夜闌人靜對住電視大叫又好似唔係咁好，亦可以對住新智能遙控器上的收音咪發出指令，測試效果都令人滿意，較高音嘅女聲會比男聲易認一點。想轉講英文都得，只要在系統選單上揀選英語即可。

強化Smart內容及升級功能

聲控之外，ES8000系列仲有體感操控這個有趣玩法，只要用一隻手掌在畫面上慢慢一掃，ES8000系列畫面就會顯示Cursor，跟住就可用手掌當成電腦滑鼠揀選選項，合埋手掌就可確定選擇，試玩時靈敏度都幾唔錯。另外新機加入更多本地Apps，例如為小朋友而設的Kids、可連上無線電子磅的Fitness和群組聊天室Family Story等Smart Content。此外亦有Smart Evolution功能，只要加入模組就可以升級電視的硬件及應用程式的功能，例如將雙核處理提升到四核；雖然要到2013年先開始推出升級服務，但以依家嘅「基本」功能已經無敵！

SPEC

顯示解像度：1,920x1,080

流暢倍增技術：800Hz CMR

連接介面：HDMI×3、USB×3

3D眼鏡：主動快門式3D眼鏡×4（隨機附送）

查詢：3698 4698