HT T-800 開腦重生
自從1984年阿諾舒華辛力加拋出一句︰「I'll be back！」後，《Terminator》系列就長拍長有，勢估唔到電影以外，玩具一樣回歸完後再回歸！繼MMS版本後，最近Hot Toys再以DX名號推出新版T-800，不但執正咗服飾、武器，又加入可轉眼系統，最重要係今次可以幫T-800開腦做手術，可玩性歷代最高，作為忠實Fans又點忍得手！
T-800絕對係經典角色，半胸像、頭雕、 7吋Figure多到數唔晒，最近1:4 Figure仲鬧出雙胞胎，去年Enterbay先推出過HD Masterpiece，最近HT又公布今年亦玩埋一份，一場18吋T-800大戰勢所難免，而為呢場Figure戰爭熱身嘅，正係今次嘅DX10豪華版T-800。
為舊版補完
作為SCI-FI粉絲，T-800一直係HT老闆Howard嘅至愛，喺2010年推出MMS版本時，已經花費大量人力、物力，淨係資料搜集及產品研發就用咗足足3個月，尤其是Yulli製作嘅頭雕，更獲得玩家高度好評。既然前作已經咁成功，何以今次整多個DX版本？Howard透露︰「製作MMS時，我哋已經諗過好多有趣嘅Idea，但礙於成本問題而未能實現，嗰時已經希望日後再出DX版本為作品補完，亦希望滿足到Die Hard粉絲嘅要求。」新版T-800頭雕繼續由Yullil操刀，據初版所見，個Look比舊版青靚白淨咗，表情亦更Chok，神似度保持極高水準。
玩味做手術
神似以外，原來新頭雕仲有乾坤。既然係DX系列，走唔甩實有P.E.R.S.可轉眼系統，但係今次嘅頭部採用冇頸設計，加上頭顱骨可以揭起，令內部空間變得極為不足，若再加入眼球及控制桿嘅話，難度比以往所有DX系列高幾倍；講到頭顱骨可以揭起，以往開腦做手術呢幕係Delete Scene，只收錄喺LD、DVD或Blu-ray內，依家DXFigure送齊頭皮、電腦晶片、手術鉗等配件，等玩家重演神秘一幕，玩味十足！最大遺憾係頭雕得一個，若果有埋Battle Damage戰損版就十全十美。
新版火神炮
至於包膠Body就由上一代繼承過嚟，雙臂就參考早前嘅狼人設計，以PVC連接關節，HT再喺手肘位加入雙鉸位，改善可動性，此外再執過胸形，呈現出逼爆衫嘅肌肉感。不過新版唔似上一代有機械手可換，所以前臂拆唔甩，玩家咪亂試！
服飾方面，黑超係指定動作，黑皮褸、皮褲就改為全真皮，加上拉鏈、皮扣等細節都跟足原著，貫徹HT一向嘅認真作風。武器方面，經典嘅Winchester 1887霰彈槍、M1911曲尺手槍，以及雷鳴登都落齊，火神炮仲大執過，配合新加入用嚟裝子彈嘅單膊旅行袋，將戲中阿諾由醫院衝出嚟殺敵嘅入腦情節，完完全全立體重現。
HT DX10《Terminator 2：Judgement Day》1/6 T-800
零售價︰$1,450
預售價︰$1,400
推出日期︰今年第三季
查詢︰2388 4677（Toy Hunters）
＊ 圖中為試版款式，與正式推出的版本或有若干分別。
重新改良嘅火神炮，配合用嚟裝子彈嘅旅行袋，夠晒傳神。
拉鏈、皮扣等細節位統統都跟足原著，冇偷雞。
皮褸皮褲皆為真皮，但略嫌新淨過龍，若舊化一點會更好。
手肘有雙鉸位加持，從此舉槍唔使再就住就住。
沿用MMS嘅T-800 Body，全身就有30個關節。
DX版最大突破係頭顱可以揭起，重現Delete Scene獨有嘅開腦一幕。
頭雕繼續由Yulli操刀，比舊版青靚白淨咗，戴埋黑超，個樣更Chok。
除咗火神炮，霰彈槍、曲尺及雷鳴登等T-800用過嘅武器都統統落齊。
隨盒有8隻造型手掌，地台就加入着燈裝功能。