BRAVIA HX850　膚色靚啲

不經不覺3D電視面世已有3年，現時3D顯像技術未有重大突破，廠商如想產品有新意，惟有從提升畫質入手。遠睇Sony這款新BRAVIA 3D Internet TV HX850，以為跟2011年無大分別，但其實在細微位置設計到顯示技術上都有所革新，尤其在畫質表現上更能針對訊源以至人面及文字進行優化，無論睇電視、財經節目或3D藍光電影都帶來極佳享受。值得一提，Sony為HX850換上第3代Active Shutter 3D眼鏡，飛甩之前的累贅感外，更睇得舒服，設計體貼！

新款3D眼鏡輕42%

由於技術上的限制，採用Active Shutter的3D眼鏡在體積以至重量上實難與戲院用的偏光3D眼鏡相比；Sony為HX850而設的新款Active Shutter 3D眼鏡TDG-BR750，明顯落咗唔少工夫。HX850系列跟機附送兩副新3D眼鏡，新款眼鏡比2011年款輕42%，僅重約34g，而且左右鏡片之間呈10°傾斜，能減少入射光線，令長時間觀賞時，雙眼不易疲倦。另外，HX850系列都用上唔少頂尖技術來提升3D顯示效果，其一就係採用Motionflow XR800Hz暢動流技術，透過插入影像有效增加顯示高速畫面時的流暢度，試睇《哈利波特─死神的聖物1/2》3D藍光碟時，完全唔覺畫面有任何殘影，而且光度又充足。

人面、文字皆優化

流暢之外，稱得上好畫質，也要有上佳的色彩表現和富層次感。HX850今次升級了X-Reality PRO視像處理功能，在採用雙晶片架構下，可以從龐大訊號模式數據庫比對出輸入訊源，從而顯示出最佳效果，更特別係有好似數碼相機的面部偵測功能，能夠針對人面膚色或者文字範圍進行優化，照顧到每一個細微部分。全新BRAVIA 3D Internet TV亦配備了能分區調控背光開關的Dynamic Edge LED（with Local Dimming），無論係亮度同對比度都較一般LED背光優勝，表現暗位或細微變化時，就更能凸顯它的優點。

新Monolithic設計更懸浮

小記再仔細觀察，發現HX850機身的Monolithic設計其實也有少許改良，薄身金屬底座內已藏有揚聲器，而且唔再需要另接火牛，加上邊緣位偷薄，令電視機以至底座在視覺上都更有懸浮效果。至於Internet TV上的網上娛樂功能，則大致同上年型號相差唔多，可以上網連接Sony Entertainment Network介面收睇新聞、天氣同YouTube影片等，亦加入Facebook、Twitter等社交網站Widgets，當然最方便莫過於能透過內置Wi-Fi上網，唔使再拖線咁麻煩。

SPEC

顯示解像度：1,920×1,080

顯示技術：Motionflow XR800Hz

背光模式：Dynamic Edge LED（Local Dimming）

HDMI：4組

其他新產品：N990W 5.1聲道　3D藍光組合

配合新一批BRAVIA 3D Internet TV，當然還有新款家庭影院組合推出，全部4款都是5.1聲道3D藍光家庭影院組合，當中最吸引要數配備創新磁流揚聲器的BDV-N990W，能減低失真問題。整套系統包括4個流線型座地揚聲器，以及新設計、外形有幾分跟PS3相似並以Slot-in入碟式設計的Main Unit，擺放時更可平放或配專用架作30°傾斜，方便唔同用家需要；此外還內置Wi-Fi，毋須另接網絡線就能接通網上娛樂世界。

HX75A系列　更見經濟

另一新系列Internet TV HX75A規格跟HX850相差唔太遠，較容易分辨是機身用上黑色底座。規格方面跟HX850接近，配上X-Reality影像引擎、400Hz暢動流技術同全區域控制式Dynamic Edge LED技術，惟不設內置Wi-Fi，但價錢比同尺寸HX850平近$4,000，預算唔多的話都值得考慮！

查詢：2345 2966