《LINE Card》搞鬼公仔復活卡

嚟緊就係復活節，難得有幾日假期，有冇諗過同身邊朋友講番句「Happy Easter」呢？向來以搞鬼卡通、符號作為賣點的《LINE》，最近就推出同系列新作《LINE Card》，繼續大玩過癮卡通、表情，用佢Send張賀卡畀朋友，就肯定夠過癮啦！

過癮卡通

之前《LINE》咁Hit，除咗因為柴娃娃心態外，好大程度係因為佢有獨家嘅卡通圖畫同表情符號。嚟到《LINE Card》，當然要保留呢樣招牌特色，好似嗰隻喊住嘅兔仔、自閉熊同埋拎住杯紅酒嘅金髮型男一律有齊，一睇就忍唔到笑。

圖檔易Share

新App內置多款賀卡Template，除咗上述介紹嘅得意卡通，亦有正常、玩Feel嘅靚靚卡，結婚、箍煲、生日都啱用；而且用法簡單，只要揀啱就可以即時下載，亦可以隨時更改賀卡的祝賀內容，搞掂就可以儲存做圖檔隨時Share，夠方便！美中不足的是文字冇得改大細同字型，不過佢係免費App，仲想點？

支援平台：iOS、Android

下載費用：免費

《Samurai vs. Zombies Defense》武士闖關

Android的遊戲Apps向來唔及iPhone多，不過最近就爭番啖氣；遊戲《Samurai vs. Zombies Defense》剛剛免費上架，屬於策略遊戲，控制武士殺喪屍過關，仲可以邊殺邊賺銀幣同金幣，再逐步為自己嘅道具和武器升級，打造自己成為最強武士！

橫向殺屍 刀弓兩用

遊戲以橫向模式進行，大家要控制武士殺盡版圖上嘅喪屍。遊戲進行時，用家只需控制前後移動，電腦就會因應敵方距離而自動出刀或者弓，而且武士仲有特別技能，好似Katana Slash、Summon Linghtnings等等，超多喪屍湧過嚟嘅時候就大派用場。要留意的是，武士識得自動回血，不過速度唔快，所以千祈唔好一味死衝。

武器升呢靠銀幣

每進行新一關前，都會顯示敵人類型以及其特性，好似頭幾關出現嘅Sword Warrior就擅長近攻，所以要選擇合適技能，例如遠射對付。而每殺死敵人之後，都會有金幣或者銀幣跌出嚟，儲夠一定數量之後，就可以為武士的武器、道具升呢，威力自然更加勁！值得一提，大家仲可以下載同廠的其他遊戲嚟賺金幣，記得唔好錯過。

支援平台：Android

下載費用：免費

Hot Picks：《Nokia 創意工作室》相片特效

新App提供多種拍攝特效，包括面部變形和濾鏡效果；最方便是有即時預覽，亦提供原圖、事後圖片等效果，加上有裁剪、調校等功能，執相絕對一App搞掂。另外，此App更內置全景拍攝功能，簡單將手機向右移就得，接駁位都幾自然。

支援平台：Window Phone

下載費用：免費

《Opera Mini》慳盡數據

如果想控制上網數據流量，最簡單嘅方法就係換個Browser。《Opera Mini》不但操作介面簡單，而且透過Opera 的服務器壓縮網頁，令載入網頁的時間大大減少之餘，更可壓縮90%的網絡數據，啱晒數據流量有限的用家。

支援平台：Android、iOS

下載費用：免費

《My Alarm Clock》百變鬧鐘

iPhone內置的時鐘外觀平平，新App就特別從設計着手，內置多個不同款式的時鐘，好睇又有新鮮感。除了時鐘、鬧鐘之外，亦會在同一畫面提供天氣等不同功能，將iPhone當作座枱時鐘都仲得！

支援平台：iOS

下載費用：免費

《Photo Effect Studio》齊全執圖

新App內置多樣的執相功能，除了基本的裁剪、旋轉之外，更提供大量特效，包括Lomo、Neon，一按就有9格預覽圖，直接方便，而且更可以支援相框、調色等進階功能，十分實用！

支援平台：iOS

下載費用：免費