箭神夠英 HT 1/6 《The Avengers》Hawkeye
Marvel世界中有唔少精通武術嘅英雄，好似女忍者Elektra、盲人DD等，但講到最多人識、又唔用機槍大炮嘅Hawkeye（鷹眼），相信係熱門First Choice，咁就解釋到呢位英雄雖然喺《The Avengers》只屬大茄，Marvel Studios都特登搵嚟上位之星Jeremy Renner飾演。而事先張揚會出齊所有復仇者嘅Hot Toys，繼Nick Fury後就輪到Hawkeye接棒，究竟有幾英先？
蝦餃下巴跟到足
真人版Hawkeye早喺《Thor》中嶄露頭角，晨早畀你知係Jeremy Renner飾演，無形中加快咗頭雕嘅審批時間，HT道出原委︰「佢雖然上緊位，但比起Robert Downey、Samuel L.Jackson等大明星嚟講，個樣依然易批好多，基本上一剔Pass！」咁順利，頭雕師K.A.Kim亦應記一功，試辦所見無論眼神、豬膽鼻以至髮型都極為Human-being，最正係連招牌嘅蝦餃下巴，Figure都跟到足，真係要雞蛋裏挑骨頭嘅話，就係Jeremy成名後心廣體胖咗啲，Figure臉頰應該飽滿番些少先至連戲喎。
狼人Body方便拉弓
Body方面，Hawkeye大部分時間都係背心上陣，理應用包膠Body先合理，但HT反常地用咗狼人Body，令關節外露，原因係包膠Body嘅可動性始終差啲，為咗做到拔箭、拉弓等大動作，都係主流Body划算，問心嗰句，如果Hawkeye拉唔到弓、射唔到箭，仲有咩賣點？
服飾方面，招牌背心並非一塊布了事，而係用咗四至五種物料層層疊而成，表面仲做埋滴膠處理，模擬出橫、直間等花紋，夠細緻。附件方面，當然唔會有刀槍大炮，不過把大弓跟足電影設計，弓臂可以摺起收埋，但係考慮到打開後未必受力，用嚟擺拉弓甫士有啲牙煙，所以HT整埋變形前、後兩把弓臂，配合16個箭桿、11個箭頭、箭袋及前臂甲，齊全程度直頭奧運選手咁款。
＊圖中為試辦款式，與正式推出的版本或有若干分別。
HT 1/6 《The Avengers》 Hawkeye
零售價︰$1,180
預售價︰$1,130
推出日期︰今年第二至第三季
查詢︰2388 4677（Toy Hunters）
基於可動性考慮，所以採用關節外露嘅狼人Body。
頭雕連蝦餃下巴都照顧到，要彈係黑超做工只屬一般，未夠令，期望大貨時會有改善。
背心由多層物料層層疊製成，仲用埋Spiderman嘅滴膠技術。
箭袋可放16支箭桿，箭頭就要另外加上。
拜關節靈活所賜，可以做到拔箭甫士，貪靚用包膠Body嘅話就好有難度。
軍靴入面冇腳掌，加上膠料具彈性，輕輕力就屈到。
跟足標準箭藝運動員嘅裝備，右手可套上護甲，以免被弓弦彈傷手。
膝蓋位塞咗棉花，模擬出墊Pad效果。
受制於角色設計，配件唔算多，最矚目係變形前後嘅兩把弓。
隨盒有發光地台，以及六隻造型手掌。