《吞食天地3 Online》 惡搞大頭三國

賣可愛、KUSO風（惡搞風格）的PC Online遊戲《吞食天地3 Online》兩日前開始公測，唔知大家加入了這個惡搞三國世界未？由3月中開始封測，呢套加入3D畫風、大頭角色造型的中文Online遊戲人氣一直高企，之後仲可以玩埋收服武將以至可蒐集武將卡片等新元素，極具趣味！

角色場景設計有趣

從遊戲畫面上可見《吞食天地3 Online》角色確係可愛，全部都以大頭公仔示人，用色更非常繽紛。再睇真啲，角色設計都好畀心機，魏蜀吳三國角色各用上唔同色調及代表物品，如蜀國劉備就用綠色及龍作為衣飾的設計概念，而魏國就用上藍色加鳳凰做代表，單憑外形就可分辨每個武將屬何方陣營。遊戲雖用上三國人物作招徠，但內容方面就以惡搞行先，好似可以在遊戲內見到原來係豬肉批發商嘅張飛間店舖賣廣告，另有百年老店「任添堂」等店舖，連玩家一出場練功時要對付嘅竟然係蘿蔔怪，玩落認真抵死！

轉職收服武將夠突破

Online遊戲少不免都會用上職業系統，但《吞食天地3 Online》有趣之處，係職業唔再固定只得一樣，可以按需要隨時轉職到曾獲得的職業；而該職業等級去到最高級時，更可以免費得到職業造型專屬套裝扮靚靚。對比上一代，遊戲有兩大突破，第一，是改用3D風格設計；第二，就是新增的收服武將系統，可以在城內、武將列傳或者野外遇到武將時收為己用，但大前提係當武將只剩低好少血時先會彈出可收服選項，收唔收到就睇彩數！收服武將後，除可以將佢帶上戰場，有需要時亦可將佢派到領地執行內政，玩落都幾有《三國志》Feel！戰鬥系統亦有革新，如加入陣式系統，敵人有機會會匿到隊友的背後，要先解決其他人先能夠進行攻擊，可玩性都唔錯o架！

Info

開發：中華網龍

公測日期：公測中

網址：http://hk.chinesegamer.net/ts3