MG Gundam Age-1 Normal 傑作

「拍爛手掌」係筆者砌完MG Gundam Age-1 Normal後脫口而出嘅話,皆因呢款新模型繼承《Age》系列標榜嘅高完成度素組效果外,最抵讚係全新設計嘅骨架,四肢利用類似Ez-8嘅「套件」裝嵌技術,又增加裝甲內構細節,而且頸位、肩部、腰甲及腳踭都追加大量關節,一路砌、一路有驚喜。

做人要中肯,咪成日提《Gundam Age》嘅故事有幾「兒童向」、收視有幾唔掂啦,純粹以貨論貨,MG Gundam Age-1 Normal實在係今期模型界嘅傑作。造型大致承繼咗HG模型,不過比例由1/144變大為1/100,由於四肢都以白色為主,並冇其他雜色碎件,單靠部件分色,已經完全對應動畫中嘅機體配色,素組都有好高嘅完成度。最出色係內構模件全部一體成形,再直接套喺裝甲內層,組裝乾淨利落,而且大部分四肢部件都逐節裝嵌,唔似傳統嘅前後夾件,免除打磨水口嘅煩惱。此外,為咗模擬發光效果,雙眼、頭頂及胸口嘅透明綠部分,都預先貼上銀面貼紙,可惜唔似MegaSize有埋LED燈,否則一定搶晒鏡。

關節補強硬淨禁扭

除咗骨架主體有新設計,關節構造亦全面革新,首先肩膊嘅榫位改用雙重球狀關節,增加前後聳肩幅度,至於肩甲內亦有獨立關節,可以揭起嚟提高雙臂,擺出「Y」字甫士。

另一方面,掌心位置採用獨立餅形部件,上下用Ball Joint連接,藉此強化手腕嘅可動性。雖然手指放棄咗全可動設計,但拇指仍有兩節可動,令掌形更美觀外,揸武器都實在、有力得多。再者,前後腰甲採用分件雙Ball Joint設計,令腰甲更加受力,唔怕因為扭動過多而損耗。至於腳踭部分就學Zaku 2.0嘅關節構造,不過腳眼Ball Joint改用柔軟嘅PVC製作,調整腳掌角度更容易,連帶改善埋接地性。

獨有Part Gun玩法

武器方面,就如動畫設定一樣,主武裝係Dods Rifle,可以轉動前段槍管變為「精密射擊模式」,甚至拆咗呢部分,變成火力較弱嘅Part Gun,呢樣係MG嘅獨有玩法,HG及Robot魂版本都冇。至於高達嘅招牌武器Beam Saber,就同HG及Robot魂,MG都有齊長、短劍刃,劍柄亦可收喺兩側腰甲內。隨盒仲有1/100嘅主角阿瑟姆人物,只要稍為上色,放喺駕駛艙打開後嘅艙蓋上,就可重現劇中嘅站姿甫士。

Alfred

MG Gundam Age-1 Normal
建議零售價:$399
Beam Saber有齊長短兩款劍刃,跟足動畫設計。

模型內構布滿細節位,而且幾乎所有裝甲都有內甲部件,夠仔細。

四肢嘅可動性足以媲美Robot魂,係近期嘅MG佳作。

膊頭關節改進甚大,可以大幅度向上舉臂,唔會畀肩甲頂住。

隨盒附有相同比例嘅阿瑟姆人仔,不過只係白色素體,需要自行上色。

Dods Rifle有變形機關,橫向扭動槍管,就會變成精密射擊狀態。

拆走前段槍身,就可變成手槍款嘅Part Gun。

膝蓋外甲嘅黑色部分以軟膠製成,又可單獨移位,增強跪地時嘅接地性。

手腳兩側嘅排氣槽都係鏤空設計,滲線都慳番。

可動性咁高,學埋《戰狼300》嘅招牌甫士都冇難度,你話似唔似?