《Kingdom Hearts 3D》3D可愛新招賀10周年

《Kingdom Hearts》系列出咗10年，係時候要搞吓新意思！新作《Kingdom Hearts 3D（Dream Drop Distance）》係系列首次在N3DS上推出，米奇老鼠、唐老鴨、高飛狗等原有班底全部3D上陣之外，連其他迪士尼動畫嘅角色場景都有得玩，而且亦首次引入雙主角切換操作兼育成寵物上場打怪獸，吸引力十足！如果係忠實Fans，更可買埋同日推出的《Kingdom Hearts 3D》連N3DS主機同綑版！

兼玩《創戰記》新場景

《Kingdom Hearts》系列成功之處，除咗故事性同可愛風格外，注入迪士尼動畫場景跟角色也居功不少，米奇老鼠、唐老鴨跟高飛狗三個角色係固定班底。《Kingdom Hearts 3D（Dream Drop Distance）》就再加碼收錄埋《鐘樓駝俠》、《木偶奇遇記》場景及角色，甚至連重拍嘅《創戰記》都有得玩。呢段《創戰記》場景叫「The Grid」，兩位主角索拉同利克會換上電影中嘅發光戰衣上場，更要用上光碟作攻擊，氹得機迷同影迷開心。至於新一集故事，就係延續自《Kingdom Hearts Re:coded》嘅冒險，兩位主角要參加「鑰匙大師」資格考試，目標係要解放「因睡夢而被封閉」的世界，擊倒存在於黑暗世界的「夢魘」。

自我繁殖可愛食夢獸

雖然遊戲舞台係夢裏世界，但場景設定相當繽紛，而且在N3DS上的立體顯示更比之前的NDS《Kingdom Hearts》遊戲做得靚。新作N3DS版另一新招數係引入雙主角切換使用系統，加強遊戲趣味，可因應環境而自行調配。今集玩家上戰場亦唔再係單打獨鬥，跟現時新RPG遊戲一樣，可以召喚同伴幫手。要獲得同伴，除咗要擊倒某些特定「夢魘」取得精靈外，仲可以靠集齊特定道具「繁殖」出「食夢獸」，造型仲非常可愛，如果有更多道具，便能製造出更高能力的「食夢獸」！本作亦可對應AR系統，以虛擬實境方法同「食夢獸」互動一齊玩！

遊戲Boxset勁冧粉絲

遊戲系統採用新設計，動作感比以往流暢，亦加入更多新招，也當然支援3D顯示。在新招式方面，按Y掣可使出在牆壁間飛躍的連貫動作，按A掣則可使出連貫攻擊，而且只要滿足到特定條件，更能在下畫面觸發使用「真實轉移」，可帶來意想不到嘅效果。話晒係系列10周年作品，除咗會推出連同N3DS的同綑版主機之外，亦會出多套10周年特別版遊戲Boxset，有呢隻N3DS新作《Kingdom Hearts 3D》兼有兩隻之前NDS版的《Kingdom Hearts Re:coded》跟《Kingdom Hearts 385/2》遊戲，再加送多一個N3DS機殼同12張Postcard，Fans一定冧晒！

INFO

類型：角色扮演

開發：Square Enix

平台：Nintendo 3DS

推出日期：3月29日

售價：¥6,090（約$500）

查詢：2359 7998