SlamDunk夢成真

假如我係林書豪，我就會用A方法對付Derrick Rose、B招式克制Kobe Bryant……哈哈哈，咁我仲唔威過Michael Jordan？

咪噓啦！發吓白日夢啫，正所謂：「冇夢想，同條鹹魚有咩分別？」

內地就有班熱血到痹嘅《Slam Dunk》粉絲，實行Cosplay演活自己嘅心愛角色，雖則「山寨」，Photoshop又重手得滯，不過難得由化妝到服飾，甚至表情同背景都跟到足，尤其是扮安西教練嘅肥仔確係夠肥、扮彩子小姐嗰位又夠晒厚唇，唔講仲以為日本拍真人版《Slam Dunk》。

咁，如果我係陳×迅，我又應該抄啲咩嚟扮好呢？

Dick Sin Editor

最Cute雜種

如果鬧人「雜種」，交都有得你打，同Cute大纜都扯唔埋，Kill至真！網上改圖日日有，難得有人咁得閒，將不同物種雜交Key一大餐，整出來又幾得意。不過我反而想知，如果世上真有此「雜種」，佢阿爹同阿娘係點樣製造愛情結晶品嘅呢？

Doris Hui Reporter

公然摸乳！

澎湖呢條巷仔竟然咁Open？原來呢條巷，窄到每次只可以一個人過，如果迎面有人嚟，大家惟有胸貼胸先攝到過去，難怪經常有大批人走去渾水摸「乳」啦！各位，行入去之前，記得做好防「胸」措施呀！

地點：澎湖

Champy.C Reporter

石躉當床瞓

香港地大把人嚴重缺乏充足睡眠，坐喺公共交通工具上瞓着嘅人多到數唔晒，最誇張有次見到有人攰到企喺度扶住扶手都瞓得着；不過，點都唔夠呢位朋友誇張，攰到橋邊石躉當床用，打橫成個人就咁瞓！呀！定係佢玩緊早排好興嘅趴街攝影Planking Photo呢？

地點：深井

Angelamamy Editor

穿瓜戴菜

蔬菜不單對身體有益，仲可以「裝身」！喺泰國嘅湄宏順（Mae Hong Son），小朋友以天然農作物作裝飾，南瓜帽、青豆假髮、仲有用小果實串成嘅頸鏈，真係得意。不過，小記就諗起個故事：從前有個懶人，佢阿媽驚佢餓親，於是整咗個大餅掛喺頸，點知……

地點：Mae Hong Son

Mani Lee Reporter