蘇斯開心海盜船

離心力強勁的海盜船，不是人人夠膽玩，來到突尼斯（Tunisa）的蘇斯（Sousse），卻人人爭住坐海盜船，只因這艘船不會拋人上半空，船上海盜還會施展渾身解數，落力表演氹你開心，玩到興起還可跳落水，感受暢游地中海的滋味，一樣咁High。

坐落於哈瑪麥德海灣（Gulf of Hammamet）南緣的蘇斯，面對地中海，遊船河自然成為主打節目。在碼頭看到多艘仿古海盜船，船身有兩層樓高，近看賊船手工精緻，有骷髏又有海賊雕塑作裝飾，真的似模似樣。船開了，大家紛紛走上甲板霸靚位睇風景，這天陽光普照，抬頭是久違了的藍天白雲，兩岸景色優美，偶爾吹來陣陣海風，十分寫意。突然有人發出尖叫聲，幾名海盜竟然拿刀挾持着人質……原來只是搞氣氛嚇吓大家，真的被他們嚇死！轉頭船上又播起強勁音樂，海盜們邀請了幾位靚女齊齊跳草裙舞，連男士都玩埋一份，大家又叫又跳，開心得像開Party一樣。

玩花式跳水

談談情跳跳舞，不知不覺船已駛到海中心，大家已準備好行下水禮，但人人懶得行到船下層落水，索性由上層甲板直接跳落海！見型男美女一個一個跳入海中，有些仲玩埋花式跳水，搞到我都忍唔住跳埋一份，不過去到船邊，才發覺原來都幾高，想打退堂鼓，但成船人睇住又點可以失威？惟有豁出去一躍落水，沖擊力大得令我有點腦震盪呢！身處地中海，海水又清又涼，不過海浪頗大，還是穿件救生衣安全些。

游完水回到船上，海盜們早已準備好午餐，有熱辣辣的燒魚，沙律跟麵包，味道也不錯。開餐期間，他們又來Show Time，樣子兇神惡煞，揮着刀鏗鏘有聲，估不到今次竟然玩神打！他們其中一個躺在幾把刀上，還請在場女士踩上背脊，然後若無其事起番身，引來全船掌聲。之後他又把一張大刀放在肚上，然後請位型男扶住刀柄在上面做掌上壓，看到我目瞪口呆，難道他們真有神功護體？

市集掃手信

由海上回到陸地，到蘇斯舊城區市集（Medina）滿足購買欲，市集位於阿拉伯式建築群中，甫到入口處更聞到香噴噴的焦糖味由糖果攤檔傳過來，原來小販在炒焦糖杏仁，還讓大家試食，食落香甜脆口，我立即買了幾包做手信。突尼斯的皮革產品頗出名，在市集的店舖便找到很多平靚正的手袋、拖鞋、皮鞋等，小小的店已有多達200款選擇，顏色繽紛，真的花多眼亂。為了證明貨品是真皮，店主更在我面前用火機燒袋，的確真「皮」不怕紅爐火。皮雖真，不過我還要講價，拖鞋還價一半，手袋就講到6折，收穫相當不錯，我立即穿上新買的皮拖鞋，果然軟熟又舒服。

仿古海盜船

費用：US$60（約HK$462）起

INFO

簽證：持特區護照或BNO毋須簽證

機票：香港飛突尼斯來回經濟客位機票由HK$14,041起

旅行團：美麗華旅遊的突尼斯古羅馬、阿拉伯帝國考古、尋寶之旅8天豪華團，團費HK$7,499起。

查詢：8200 2299 　

貨幣：TD1約兌HK$5.1，美元及歐元通用。

天氣：4月氣溫約13℃-24℃ 　

時差：慢香港6小時