on.cc 東方互動主頁

Dell首部Ultrabook XPS 13 輕過同級

雖然係由唔同廠商推出，但市面上多款Ultrabook嘅規格幾乎都係倒模：Intel Core i5處理器、4GB記憶體、128GB SSD搭13.3吋屏幕，要鬥就要鬥輕巧、外形設計跟電量，新推出嘅Dell XPS 13 Ultrabook在這幾方面就有不俗表現。尺寸方面較13吋型號手提電腦細15%，亦較同級Ultrabook細及輕，機身更只重1.36kg，最正係操作時間達到8.5小時，玩足一日都夠電，唯一要考慮係價錢跟質素成正比！

羽量級輕巧

Dell XPS 13 Ultrabook初見於1月美國CES展覽，到3月中推出都唔算隔得太耐，但對比其他廠商由去年底已開始出機，明顯失咗先機，幸好新機到港，無論機身設計以至操作都算幾吸引！最先映入眼簾係採用非常Minimal設計的鋁質機面，配以用上陰陽格仔設計嘅碳纖底座，外形設計對辦，加上纖薄機身，都幾有MacBook Air影子。XPS 13 Ultrabook機身體積只有316×205×18mm，而且機前最薄部分亦只有6mm，比唔上MacBook Air，但仍具吸引力。對比同級Ultrabook還有較細的平面面積，重量亦做到1.36kg如此羽量級，比普遍達到1.4至1.5kg重的同級機種輕巧，對於最講求輕巧易攜嘅Ultrabook嚟講，確係賣點。

細位設計有心思

正如前文提過，不同廠商推出的Ultrabook硬件配搭都相差無幾，XPS 13 Ultrabook所配備的是Intel Core i5-2467M（1.6GHz）、4GB記憶體、Intel HD Graphics 3000圖像顯示加上128GB SSD，而且所配備的13.3吋顯示屏亦是1,366×768解像度款式，但Dell聰明在將幼邊框設計引進到Ultrabook之上，所以XPS 13 Ultrabook顯示屏四邊邊框都非常幼，因此能做到比同級機種更細。機身輕薄但卻無礙機身的防刮花同散熱性能，試用時都唔覺得機底散熱口燙手。而翻到機底更能睇得見廠方的心思，在機底正中央部分有一塊刻有XPS字樣的鐵牌，相當有型，外國訂機更可做埋個人化的刻名服務，但香港暫時就未有提供同類服務。

可改配Core i7及256GB SSD

Ultrabook連接介面較少係無可避免的先天性不足，有廠商改以外接模組方式接上其他連接介面；而XPS 13 Ultrabook機身上所設置的介面亦少，分別提供各一組USB 2.0及USB 3.0介面及Mini Display Port端子，HDMI端子改以外置方式接上Mini Display Port，而LAN端子亦如是，但不設記憶卡槽而改為放置電池容量顯示燈。好在機身都設有不少「特異功能」，譬如加入Intel Smart Connect功能，喺休眠狀態下可以自動更新網頁或者收發郵件，而且開機時間最快只需要8秒，休眠狀態下起動最快亦只需1秒，反應夠快隨時都可開機工作。抵讚的還有新Ultrabook的電量表現確實唔錯，機上採用6-Cell電池，最長操作時間達到8.5小時，基本上足夠一日使用。而所預載的應用程式還有跟Dell其他機種相同的Stage UI，介面美觀又易用，可輕鬆開啟多媒體程式。如想追求更高規格，大家還可轉買Core i7處理器搭256GB SSD的高階版，$13,999有交易。