得意貓Apps 喵爆Android

iOS嘅Apps的確係多過人，但係計我話，Apps貴精不貴多，好用同夠用就得喇！其實Android都有唔少好Apps，特別係對愛貓之人嚟講，就有好多有趣又可愛嘅貓咪Apps，今次小記就為一眾貓奴精選幾個必裝之Apps啦！

即拍即上傳《Petcamera》

Petcamera同一般影相Apps唔同，佢係一個專畀寵物愛好者分享相片嘅平台，只要用Facebook、Twitter或者本身平台登入，就可以將自己影或人哋貓咪嘅相加上各樣得意效果，仲可以即刻上傳到Facebook或Petcamera平台；如分享到Petcamera的話，就可以畀其他用家欣賞你嘅大作，最多人讚的相片還可上排行榜威風一下。

下載費用：免費

貼身陪伴《Desktop Charactor ver cat》

每日返工返學都總難免要同家中愛貓分開一下，為一解相思之苦，大家可以裝呢個App，佢會有隻卡通貓長駐喺你個桌面之上，唔單止可以揀番貓仔嘅外形，仲可以幫佢改埋名，最正係可以自行設定，擺Shortcut喺佢身上，更可以顯示埋時間。以後只要你部電話有電，愛貓都會時刻陪住你。

下載費用：免費

消閒最啱《貓救援拼圖》

這遊戲App同好耐之前另一隻Android遊戲大同小異，不論玩法同畫面都十分類似，不過主角變成貓仔。大家要幫佢逃脫，遊戲有多達3,150關，如果要消磨時間，絕對係上佳嘅選擇。

下載費用：免費

日貓博客《日刊ねこ新聞─貓情報まとめ》（Catstimes）

呢個App集合日本最受歡迎嘅貓Blogger，下載後，就可以每日睇到30個以上Blogger貼出嚟嘅貓相，鍾意貓貓的你真係不容錯過，唔識日文齋睇相都過癮，不論你想睇蠢樣、精樣、寸樣或者係呆樣嘅貓，都可一次過滿足晒。不過呢個App由於係日文名，所以大家最好搜尋作者個名「nyacck」下載，唔係就難搵喇！

下載費用：免費

小貓記事本《ねこめも》

呢個小貓記事本個App名都係日文，大家又係要靠作者名「uho.club」先搵得到。市面上有唔少記事App，而呢個小貓記事本作用其實大同小異，只不過似喺精品舖大家都見唔少嘅得意版本記事簿而已，不過咁可愛，仲唔使錢，愛貓之人不妨下載。

下載費用：免費