閃避英雄六年未輸過

一個月黑風高的晚上，蝙蝠俠大戰蜘蛛俠，但武器不是蝙蝠鏢或蜘蛛絲，而是130km/h的閃避球（Dodgeball）鬥掟鬥閃！經過一輪急攻，勝負未定，但彼此贏到友誼及敏捷身手，扮演蝙蝠俠的香港閃避球總會會長Brian Li更謂︰「目前香港聯賽共有600人參與，咁多人玩，皆因閃避球可以一人救番整支球隊，畀到人現實中搵唔到嘅英雄感，香港隊仲已經六年嚟未逢敵手，我哋都等緊有強隊挑戰！」

起源於英國的閃避球，隨着歐洲人移民新大陸，20世紀初盛行於美國；1902年，日本留美學生再將閃避球帶回祖國，時至今日已被日本列為學校體育教材之一。香港方面，香港閃避球總會（Hong Kong Dodgeball Assocation，HKDA）於2008年成立，初期只舉辦銀行業界之間的小型比賽，現任會長Brian接手後，已發展至擁有四大級別、一個女子組、共600人參與的運動聯賽，比很多職業聯賽更具規模，Brian娓娓道來：「以前閃避球冇劃一規則及場地，國家之間亦冇正規賽事交流，所以一直只屬於地區性運動，自從2010年首屆亞洲錦標賽搞起，我哋統一咗所有賽制，其他國家亦都照跟，所以香港閃避球喺亞洲具有一定領導地位。」

救番全隊做英雄

閃避球講求五個「D」，依序分別是Dodge（閃）、Duck（蹲）、Dip（趴）之後，再重複Dip（避）和Dodge（閃），玩法簡單，但Brian指很多人一玩便上癮︰「閃避球畀人攞正牌掟人，將工作、生活壓力發洩出嚟，而且愈大力愈好，係紓解壓力嘅好方法。」另一港隊成員Adrian補充︰「雖然閃避球被掟中就要出局，但只要成功接住個波，就可以令出局嘅隊員返入場，所以就算剩番一個人都可以反勝，全隊當你英雄咁歡呼，好有成功感！」閃避球另一好處是沒有體格要求，任何年齡、性別都可樂在其中，Brian指出：「閃避球唔係靠一鋪蠻力，就算你唔大隻，但只要掟波準、跑得快或者避波勁，都可以喺隊中搵到自己嘅位置，所以我哋比賽時會按各人特點嚟分配位置，就算女仔都可以擔起大旗。」

場場有Record

目前香港閃避球聯賽一年分兩季進行，一星期打足四日，比賽期間有專人拍片以作記錄，其後HKDA便會為每位參賽者作數據統計，例如命中率、閃避率及出局次數等，最後再計算每個人的平均值。Brian認為這做法可提供一個數值目標，鞭策參加者努力求進外，還可作為挑選港隊成員的標準，他分析：「雖然香港人嘅身材較輸蝕，但勝在靈活、有耐力，玩閃避球往往比外國人仲要叻。自從成立咗香港隊，六年嚟同外隊比賽未嘗一敗，新加坡、菲律賓及馬來西亞等都係我哋手下敗將，首屆錦標賽時男女子組仲齊齊奪冠！」據知港隊剛於上周六與美國隊大戰，最終亦以一分之優勝出。Brian續說：「依家我最希望香港政府可以給予贊助，將閃避球推廣至本地中小學，令呢項運動有更多人參與。」

電影遊戲閃埋一份

很多運動項目都會被改編成電影或電視遊戲，閃避球也不例外，2004年荷里活電影《屎波快閃隊》（Dodgeball）便講述正派主角Vince Vaughn為保住自己一手建立的健身室，以閃避球與奸角Ben Stiller決一高下。至於電視遊戲首推《熱血閃避球》，它是經典遊戲《熱血高校》的續作，最早於1987年在街機推出，主角可投出外觀與飛行方法不同的「魔球」，其後更進軍家庭電視遊戲，風靡電玩界。

邊度有得學？

HKDA聯賽每年大約於農曆年假後舉行，之前會有訓練班歡迎新人參與，費用全免，有興趣的話可到官網留意最新消息。

掟波有規矩

場　　地︰球場60尺長、30尺闊，兩隊各佔半場，半場面積與排球場相同。

人　　數︰每隊6至18人，其中6人站於內場區，其餘則於外場區執波或傳波；場內6人中最少有一位女性，否則只能5人作賽。

比賽時間︰分兩局進行，每局20分鐘。

規　　則︰內場區球員被球擊中身體任何地方，便要即時出局退至外場區；若內場區球員成功接到來球，則可令外場區的隊友「復活」重返內場。

勝　　負︰把對方全部球員擊出局，己方便得一分，在限時40分鐘內得分較高一隊為勝。