《Kinect Star Wars》 丁丁RB率先格劍

坊間有唔少改編自《Star Wars》的遊戲，但係可以親手施展原力，兼且拎起光劍狂劈，就只有《Kinect Star Wars》先做得到！遊戲兩星期後先開賣，不過Xbox 360率先搞咗個《Kinect Star Wars》試玩會，唔單止有Rubberband四位大男孩各執光劍興奮互格，就連「甜姐兒」丁丁（丁樂鍶）都來湊熱鬧，感受這份「大男孩的浪漫」，一邊嗌攰又一邊玩到手腳停唔到！

結合六齣星戰電影內容

《Star Wars》遊戲擺明係「Fans向」，唔少大男孩飲「星戰」奶水大，今次Kinect版當然係要照顧Fans啦！本作內容非常忠於《Star Wars》設定，結合咗六齣電影的內容，熟悉嘅角色、戰艦、外星生物同場景都有在遊戲現身。但正如之前所講，《Kinect Star Wars》係以全體感操控，唔使再用手指釋放原力同揮光劍，玩家可真正用左手使出原力，揮動右手當拎起光劍同敵人互格，向前彎身即可向前衝，好有親身跳上星戰舞台嘅感覺，無論係「星戰」死忠Fans，抑或係新手都可藉好玩的遊戲操控來感受星戰世界！

兄弟內訌鬥Podracing

《Kinect Star Wars》絕地武士故事模式入面，可以用原力同光劍攻擊敵人，仲會因為劇情推進再駕駛埋戰車或者上戰艦打場炮擊戰。試玩會上就有得玩由尤達大師領軍「Jedi Destiny: Dark Side Rising」嘅「Kashyyyk戰役」，可以支援兩個人合作挑戰。有時間慢慢煲故事模式當然好，就算心急都可以直接進入格劍「Duels of Fate」、隨住星戰音樂跳舞的「Galactic Dance Off」、變身大怪獸搞破壞嘅「Rancor Rampage」等唔同模式；不過今次試玩會上嘅試玩版就未收錄這三個遊戲模式，但就有得玩緊張刺激嘅Podracing比賽，用雙手直接操控Podracer鬥飆！Rubberband成員阿正及阿偉更搶住試玩Podracing對決，玩法係靠向前伸手轉向，如伸出左手則向右轉，儲滿氣將兩手收到胸前再推出即可短時間加速，運動量雖然無揮光劍咁大，但兩人劇鬥三分幾鐘後都話手臂有啲痠軟。至於賽果方面，阿偉就技高一籌拎第一，阿正就得第五囉！

星戰迷專業意見

阿一＠501部隊：「以前冇諗過真係可以出到原力！對比其他星戰遊戲，呢隻遊戲做得好接近星戰感覺，我初步會畀9分，如果有埋揸飛機就Perfect！」

Terence＠501部隊：「我暫時會畀8分。（記：差啲乜呢？）如果個畫面有人咁高，好似置身現場就會畀埋剩低嗰兩分。」

《Kinect Star Wars》遊戲資料

類 型： 體感動作

開 發： Terminal Reality

平 台： Xbox 360 Kinect

推出日期： 4月3日

售 價： $259

查 詢： 3071 4868