今日攞貨　新iPad影相巴閉

換上極靚Retina Display的新iPad預訂反應超乎理想，香港新iPad今日取貨，唔知大家之前網上預訂成唔成功呢？新iPad最大賣點係用上超高解像度Retina Display，睇相、睇網頁同睇片都靚得誇張，但其實除顯示能力超強外，新機的拍攝能力亦一樣強橫，影相全程自動對焦唔會Out Focus外，具備Video Stablization的1,080p攝錄功能更係一絕，質素靚過好多DV！

拍攝能力：高速自動對焦

今次新iPad機背iSight鏡頭大升級，像素達500萬，而且鏡頭面積亦較iPad 2大，有理由相信新iPad所用上的感光元件亦較大，亦表示拍攝影像質素較佳。文字太抽象，實試最實際，由於新鏡頭加入自動對焦功能，只要一拎起新iPad準備拍攝，鏡頭就極速自動對焦，就算係稍縱即逝的場面，都唔怕錯過攝影時機。新iPad當然支援Tap to Focus功能，可以一篤畫面選擇對焦點，更正斗嘅係加入埋Face Detection功能，自動為每張人面調校理想曝光，拍攝時面部唔會過黑或過光，跟現今數碼相機睇齊。

將新iPad跟iPad 2拍攝效果一比，會發現新iPad鏡頭會較iPad 2廣角，即是在同一距離下可拍攝到更大範圍環境，影風景或團體照就較好用；至於在影像質素方面，新iPad成像力較實淨同細緻，但比iPhone 4S還要差少少，在室內拍攝（F2.4\ISO800）會出現較明顯的雜訊，不過作為拍攝生活照用途已交足功課。

《iPhoto》app執相超易用

在新iPad的超高解像度顯示屏上睇相，比屋企電腦顯示屏更靚，而且色準方面亦較iPad 2好得多，影像飽和度亦明顯高一班！但係新iPad並無好似iPhone 4/4S咁加入HDR功能，背光拍攝時效果未算十分好，不過用埋新推出的《iPhoto》app就有執相功能。相比其他iPad上的執相程式，《iPhoto》app一來賣得平，只係US$4.99，另外用戶介面整得又靚，用手指Touch及Hold就可衍生出好多工具，要執靚個藍天或者執靚膚色都只係掃幾下就搞掂！

攝錄能力：拍得順滑又穩定

相比之下，新iPad拍片能力顯得更加吸引，效果更超乎預期。攝錄解像度由iPad 2時的720p提升到1,080p，係第一部可以同時攝錄、顯示同編輯（配合《iMovie》app）1,080p影片的流動裝置，而且仲加入埋DV必備的Video Stablization影像穩定系統。為測試影像穩定系統有幾強，小記在三藩市搭乘Bay Cruise出海兜一圈，出海一刻經過著名的Pier 39，由碼頭建築到攤在浮板上曬太陽的海獅都拍得又Sharp又靚外，影片又夠順滑而且亦拍得幾穩定，就算玩埋Pan鏡在金門橋下拍攝靚景，影片亦夠順滑，層次感亦相當唔錯。拍完片時仲可以即時用埋已升級對應Retina Display的iMovie app剪輯1,080p影片，下載要US$4.99，絕對抵畀！

播放高清片測試

要試盡新iPad的高解像度顯示屏，當然唔少得試睇高清影片，測試時以新iPad跟iPad 2同時以Wi-Fi連線上iTunes Movie Trailers網站直接觀賞《The Avengers》高清Trailer。短片中明顯可見新iPad播片時的色彩還原度以及畫面細緻度，都好接近戲院感覺，放大睇就更見兩者的分別。

文字測試

Apple新iPad發布會中都講明新機在顯示文字時會更滑更靚，尤其係顯示中文字同日文等多筆劃文字時就更明顯，上網睇on.cc網頁版時，即使未拉大畫面都可睇得清細細粒的文字，放大後唔覺有「狗牙」，睇報紙就最啱！

圖像及電量表現理想

香港現時只推出Wi-Fi版新iPad，暫時就試唔到4G版的高速上網能力有幾好，睇嚟都要等Apple同網絡商傾掂先有得賣。新機亦換上新A5X處理器，當中的圖像處理器由A5的雙核提升到4核，玩3D遊戲好似《Infinity Blade》、《Real Racing》時表現較好，但運行一般apps時又未見得太大得益，但試玩半日後，電量表現同iPad 2相近，都換得過！

查詢：800 908 988