大廠終上Android 4.0 Acer Iconia Tab A200食得樂
好多山寨廠號稱其生產的Tablet一早已經採用Android 4.0，不過明眼人一睇就知個系統係夾硬裝上去，淨係想有官方市場同Flash Player都要左整右整。至於大廠出品嘅Tablet，早前市面上都係坐3.2望4.0，不過依家唔同晒，因為具有完整Android 4.0.3系統加全功能嘅Acer Iconia Tab A200登場，等大家感受吓咩叫做「掂」！
首部全功能雪糕三文治
齋聽名字可能會以為Acer Iconia Tab A200極其量只係A100的後繼型號，點知A200唔似A100用7吋芒，反而用上A500嘅10吋屏幕，望落似係A500後繼機；誰知真正的A500後繼機下月先會面世，咁究竟A200係咩來頭呢？原來佢係全港第一款採用全功能Android 4.0系統的Tablet，雖然市面上有山寨平板行Android 4.0，不過佢哋個系統就有好多兼容上嘅毛病，而A200既屬大廠出品，個雪糕三文治（即Android 4.0）自然好食得多，加上配合推出有一段日子的Tegra 2處理器，呢個組合確係十分穩陣。
引入Acer Ring介面
老實說，A200個規格比起其他新機真係唔算吸引，而Tegra 2處理器加上1GB RAM其實唔少舊機已配備，所以佢今次A200主要賣點係外形同系統。A200雖然厚達12.4mm，唔算薄，不過由於用塑料材質外殼，令重量可控制於710g以下，而機背使用具凹凸感設計，拎上手十分舒服，亦可避免發生跣手墜機嘅慘劇。而內涵除Android 4.0做賣點外，今次Acer特別將W500機種上大受好評嘅Acer Ring介面放入A200，不過今次唔係用「五爪金龍」操作，而係喺畫面下方加個快捷鍵；而呢次Acer Ring功能可以隨意變換快捷鍵，亦可預設指定網頁，簡化整個操作程序，大家用得更方便。除Acer Ring外，普通鎖屏介面都有自設快捷鍵，有別於其他品牌嘅平板。
多樣化內置Apps
A200價格就夠晒吸引，另外更有大量預載Apps，而且都各有特色。
適量簡化介面
相比起同尺寸嘅姊妹機A500，A200定價確吸引，只售三千多元，惟針冇兩頭利，這亦代表介面方面要控制成本，例如A200只有200萬像素前鏡頭，亦無影像輸出介面，令部機擴充能力大減；但係就保留USB OTG介面，可以畀用家外駁唔少周邊產品，所以都算有一定吸引力。
SPEC
處理器：NVIDIA Tegra 2 Dual Core 1GHz
記憶體：1GB DDR3
儲存容量：32GB、支援最大32GB microSDHC
顯示屏：10.1吋多點觸控電容屏幕（1,280×800解像度）
無線支援：802.11n、Bluetooth 2.1+EDR
尺寸：260×175×12.4mm
重量：少於710g
查詢：2821 0200
$3,398
背面採用不易滑手的凹凸紋設計，加上左右喇叭設於下方，拎上手感覺不錯。
10吋機體芒大夠清，不過官方未有標明是否IPS面板，但小記親證可視角度也不錯。
A200預載了原裝的Android 4.0.3，運作流暢又穩定，亦係市面上首部用呢個系統嘅機種。
Reset鍵和microSD卡槽有防塵蓋防止入塵，算幾有誠意。
介面走簡約路線，空間鬆動，而且具有正規USB OTG供用家插周邊配置。
鎖屏開關位於音量鍵隔籬，十分易搵。
多樣化內置Apps
用得NVIDIA處理器，又點少得《NVIDIA Tegra Zone》下載遊戲。
《LumiRead》是著名電子書軟件，可連上網上書店買書。
《Soundhound》可以幫用家以收音方式辨識歌曲，玩味十足。
《Clearfi》打造數碼家居，可以連接其他影音裝置，互相分享檔案。
Acer Ring只需要輕按畫面下方Icon即可開啟，夠晒方便。
鎖屏都可以直接開App，唔使開鎖慢慢揀，慳番好多工夫。
無後置鏡頭，不過前置鏡頭有成200萬像素，平時影相都尚可以應付到。
試相區
雖然鏡頭只有200萬像素，不過拍照質素不差，拍生活照應不成問題。
試片區
以《Amazing Spiderman》預告影片測試，A200的亮度似乎不算好，幸好顏色和銳利度則還不錯。
效能測試
以《安兔兔軟件》測試，總分達4,863分，在雙核機種中表現算不錯。
試Game區
下載《Frontline Commando》測試，遊戲運行十分流暢，而1,280×800畫質更見細膩。
