Alcatel One Touch 995 Ultra 親民大芒

一年一度的手機界大型展覽MWC 2012正如火如荼地在西班牙巴塞隆那進行，HTC、LG，甚至久未有新作的Nokia都有旗艦機推出，值得留意！香港方面亦同樣有手機教人期待，因為低調多年的Alcatel推出新作One Touch 995 Ultra，雖然不是四核心處理器、亦非Android 4.0平台，但就主攻平價市場，$2,680就可以享受到1.4GHz處理器以及4.3吋IPS靚芒，睇片夠爽、上網亦好順，大打親民牌！

源於法國的Alcatel，手機設計向來甚有特色，好似早年的彩芒摺機OT835和頭大身細的OT535都非常Trendy，可惜市場反應未見熱烈。直至2004年，內地大牌TCL收購Alcatel手機業務之後，近年就集中推出Android手機，如酒紅色的OT990及雙卡機OT918N都有不俗的口碑，而今次推出機能更強的One Touch 995 Ultra，隨時可殺出條新血路。

防滑磨沙機背

以往Feature Phone年代，Alcatel手機都以獨特的外形設計作賣點；可惜篤芒手機要遷就大芒，設計上就較難有突破。作為品牌新一季的旗艦機，995 Ultra就從機背入手；機面仍是一貫的四邊圓角設計，但黑色版本的機背殼就特別經過磨沙處理，機殼表面的質感大大加強，亦可有效減少黏上手指模或油漬，容易打理之餘，仲有輕微的防滑功能，大手汗都冇咁易跣手跌機！

4.3吋IPS面板

有留意近年Smartphone行情的話，不難發現大芒熱潮已來臨；而995 Ultra亦相應換上大芒，4.3吋屏幕更用上高質素的IPS面板，不但可視角一流，最大優點是色彩自然，對比度仲相當不俗。實測睇片，發現黑位、暗位都唔會一舊舊，細節猶在；另外，屏幕解像度達480×800，睇網頁細字以及相片都算細緻，整體表現唔錯！而且機身底部更內置HDMI輸出，買條Cable就可以將手機畫面直接Mirroring到大電視或者大屏幕，同朋友、屋企人一齊睇片、睇相就夠晒過癮。

大廠CPU保證

雖然Alcatel已被內地的TCL收購，但新機內涵卻沒有「山寨化」，規格與一般大廠手機無異。如處理器方面就用上Qualcomm 1.4GHz處理器，配合512MB RAM之下，載入大食程式如Flash插件雖不及雙核心機款般快，但一般操作如開Apps、播片、換頁都相當順暢；要彈的是新機只有2GB ROM，裝多幾個Apps就會隨時唔夠位，相信用家要活用App2SD的功能。而軟件方面，新機暫時只採用Android 2.3系統，不過出廠時卻預載了SPB Shell 3D介面，視覺效果突出之餘，經廠商優化後用落亦流暢，以中階入門機來說，絕對合格！

查詢：3180 2777