HT神盾局長正義男冇卸膊

「局長」兩個字，難免令港人聯想到「高薪低能」、「卸膊」等負面詞語，但對「神盾局長」Samuel L. Jackson嚟講，卻係「正義」及「英明神武」嘅化身，由佢飾演嘅神盾局長Nick Fury，領導一眾Super Hero維護正義，何其威風！《Averagers》四月先上映，Hot Toys 1/6 Nick Fury已經搶先曝光，而且有齊長短火Parts，Man到震！

Nick Fury全名係Nicholas Joesph Fury，打過二戰，因為子彈碎片打中左眼而戴眼罩，退役後組織咗神盾（S.H.I.E.L.D）呢個英雄團體，自己做埋局長；咁重要嘅角色，Marvel Studio喺拍攝《Iron Man》第一集時已經安排佢出場埋下伏線，HT亦注意到呢一幕︰「嗰時我哋已經想幫佢出1/6 Figure，奈何《Averagers》嘅角色實在太多，衡量過受歡迎程度後，都係先將資源放喺雷神、美國隊長等主角身上，依家終於輪到Nick Fury出場。」

最神似山姆Figure

若果閣下玩開HT出品，應該記得佢哋已經唔係第一次出「山姆大叔」，《The Spirit》系列就出過佢飾演嘅章魚博士。時隔多年，HT嘅雕工當然不可同日而語，Nick Fury就由Kojun雕頭、JC.Hong上色，輪廓逼真準確之餘，就連皺紋、眼紋、鬚根都跟足，眼白亦似足真人略帶微黃，可算係目前Figure界最逼真嘅山姆Figure。面部配件方面，眼罩、耳機都跟齊，不過前者跟頭雕係一件過製成、冇得拆，可玩指數跌咗少少。

服裝配搭拍住Wyman

天下間識着衫嘅光頭佬，又豈止Wyman一個？為咗加強Nick Fury嘅英氣，除咗頭雕，HT喺服飾上亦都花足心思，仿皮褸由光澤、質感都同真皮好接近，裏面又加咗鐵線，以便擺出唔同角度嘅飄逸形態。除此之外，黑色Jacket並非普通布料，而係用咗T恤棉、仿皮及尼龍等多種物料混合製成，再加入海綿裝出小肚腩，有層次感得嚟又貼近真人身材，就連皮Boot都唔係一件過啤膠，而係由多層軟膠縫合整成，唔怪得咁Detail啦！

HT 1/6 《The Avengers》 Nick Fury

零售價︰$1,180

預售價︰$1,130

推出日期︰今年第二季

＊圖中為試辦款式，與正式推出的版本或有若干分別。

查詢︰2388 4677（Toy Hunters）