John Ho 中佬出走

夢想，從來都是「談的容易做的難」，再配合一下世故的嘆息，成件事合情合理；但細心一想，就發覺欠缺邏輯：空談夢想，不去實行，有何原因？

「要放棄一切，重頭嚟過，我唔知做唔做到呀！」

「都唔知得唔得，到時實現唔到咪弊？」

美其名「內心掙扎」，歸根究柢3個字：冇勇氣。

將不敢尋夢的現實，說成有種種困難未能實現，是騎劫夢想的絕佳理由，若年過30，生活穩定，說來就更理直氣壯。不過，繪本畫家John Ho（何達鴻）卻在33歲（零兩個月）時，帶着留學的夢想，出走東京，一年內由中佬變「中學生」，學會人生第4種語言，更遇上一生最愛、經歷311地震……旅途結束，他還是要回來，但中佬的夢實現了，你懷疑他有中年危機？他老實告訴你這一年有如發了場夢，那又如何？夢想談的容易，有勇氣實現的人，才真捧！

肉肉之年 做咗先算

「沒把想做的事做出來，人就只是討飯過活。」John Ho將自己東京之旅所想所感結集成書，推出《東京肉肉─日本留學物語》，這是他序言的其中一句；跟周星馳名句：「人如果冇夢想，同一條鹹魚有乜分別？」是異曲同工。但John Ho並非齋講，素愛日本文化的他，為圓留學的夢，在33歲零兩個月時，隻身出走東京，開始人生第一次長途旅程。

人到中年，正路火已收、心已淡，還去尋夢，換來的是：「你估你仲十八廿二咩？」「唔係咁戇居吖嘛？」等的溫馨提示。為甚麼十八廿二發夢是不羈，中佬尋夢就是戇居？John Ho可謂感同身受：「有朋友話我戇居，但30歲後，我辭了正職，在家畫畫，不用日日返工，生活開心又自由，又能做到自己的作品，而且Home Studio更好，不用買衫、搭車，使錢仲豪過有工返嗰陣。（中年危機？）可能吧，但我覺得人大了，如果仍有氣力去另一個地方生活，又能做得到，其實都幾自豪！而且我覺得做咗先算，賺錢幾多不是太重要，有一個體驗更加重要，這亦是《東》的主旨。」

這位中佬無懼成為全班最老的同學，不怕用小學生的日文Copy Book，不怕第一個舉手參加班會活動，只怕一年時間太短，「30幾歲人仲可以好像中學生咁返學，成班同學有講有笑，仲會因為傾偈畀老師鬧，返到屋企要做功課，人生有幾多時間可以咁樣？好似發夢咁，真係好開心。」能夠活得年輕，又何須忌諱年紀？

浪漫到底 5年之約

肉肉熊是《東》的主角，也是John Ho的化身，但名字未免太Hea，卻不無中佬自嘲意味：腰間有肉，臉上有肉，「肉肉」之名當之無愧。如果大家曾為《蜂蜜綠茶》的淡然溫情而觸動，大概也會被《東京肉肉》中肉肉熊與花花貓的浪漫故事徹底感動，從來對浪漫避之則吉的小記，也不得不說：「使唔使浪漫到咁徹底呀？」

John Ho說：「很多人看完都說超浪漫，但真實的東西才最感動人，如果去得不夠盡，不夠徹底，主題就會變得模糊。」可是訪問中談到這段感情，他卻談得不夠徹底，那個曾經想在日本拋開的怕醜個性忽然回魂，「能夠遇到喜歡的人，印象當然深刻，而且她是可以對一世的人，在一年期限將至，我哋互勾手指、打手印，簽合同（兩隻手掌平放並前後滑動），最後訂了5年之約，將來如何？順其自然吧！」一生人能有一段如此美好的愛情，多好。

雖然感情戲吸引，但說到尾，透過自身經歷感染他人踏出夢想第一步，才是John Ho最想做的。「要實現夢想不難，最難是被一些無謂理由阻撓，點解唔趁有生之年，經歷多啲？青春好快就過，如果每日返工放工，一年一年咁過去，到你有家庭之後，想去實現夢想就好難。」你以為John Ho放棄香港一切會輸掉身家？他告訴你他比以前豐盛，「返嚟一年，覺得比以前活得更豐盛，其實只要你去揀，冇嘢會阻礙到，唔好齋講，要做先得！」

經歷地震 香港真有福

尋夢之時，日本發生311大地震，John Ho坦言有閃過死亡的感覺，「有種說不出的恐懼，但夢想只是一個過程，若要我這麼戲劇性地死，我也死而無憾吧！」說來輕鬆瀟灑，但他在地震後順利回到香港，心情才真正定下來。「以前覺得香港冇雪落好唔浪漫，但日本落雪時其實好滑又不方便，又好似韓國經常零下溫度，心情好抑鬱，反而香港最舒服，沒有天災，真係一個福地，夜晚仲有通宵車，最重要係香港好容易食到日本嘢，日本就好難食到香港嘢，就算有都好貴！」談到食，才想到香港的好。

下一站台灣 創一番事業

離開日本一年，John Ho仍時常幻想重返舊地讀書，但人生太短，想去的地方太多，下一站是充滿文化氣息的台灣。「完成手頭工作，我應該會去台灣，那裏生活指數低，可以吃便宜的美食；台灣有一種文化氣息，有大大小小的24小時書店，幾時想睇書都睇得到。」其實誠品書店今年中也會進駐香港喎！「當然，另一個原因是我希望在台灣創一番事業，香港繪本市場太細，我想走得更遠，台灣的空間較大，而且都是用繁體字，有機會也想打入台灣市場。」

後記：想做九把刀

曾有人形容John Ho是「港版幾米」，但他從未想過成為另一個幾米，「始終風格不同，但能像他那麼受歡迎當然好，反而我想做九把刀多啲，因為佢比較麻甩、真性情，同聲同氣！」那麼，期待有天見到肉肉熊遇上《那些年》的花花貓，有個Happy Ending！

後後記：

言猶在耳，文章見街前收到《東京肉肉》奪得第二屆中華區插畫獎中華區最佳出版插畫獎冠軍消息，入圍作品來自中港台及澳門，為着此事凌晨跟John Ho Whatsapp，小記問：「（得獎）是踏入大中華的第一步？」，他即時回應了三隻手指公圖案畀我！大抵是勇闖台灣最直接的強心針吧！

John Ho Profile

繪本畫家及平面設計師，除了繪畫，亦寫專欄、拍動畫及做美術指導。初出道時於潮誌《amoeba》畫插畫，並於1999年推出首部個人畫集《忘記旅行》。