Reporter's Choice

深水埗多口味湯圓

深水埗一向出名多美食，而我每次跟三五知己開餐後，例必到松記糖水店繼續下場。以前未有咁多分店，這裏人龍極長，最少要排半個鐘，現在？等一陣咁多啦就！店子最受歡迎的叫「幻彩明珠」，大熱天時是我的最愛，選用煙煙韌韌的「琉璃水晶」炮製，口感特別，加埋雜果、涼粉、杧果汁等，非常豐富。而冬天我會選「六寶湯圓」，顧名思義有6種口味，芝麻、花生、奶黃、紫米皮粉黃、綠茶皮奶黃及紅豆，啱晒我呢類心多多的人，食完暖笠笠，很滿足。

荃灣奄列巨無霸

很多人喜歡到連鎖式Coffee Shop歎咖啡，我則較支持本地文化，力撐茶餐廳。其中荃灣的嘉樂冰廳是我最常流連的地方，每次必點它的巨型火腿奄列。這款奄列單是賣相已嚇窒不少人，像一座小山般高，原來用上6至8隻雞蛋做成，而且要慢慢煎才夠香滑，最少要等20分鐘先有得食，配合軟綿綿麵包，分量足夠二人Share。

太子生猛海鮮

以前我只會去西貢、流浮山食海鮮，因為直覺上這些地方的海鮮才夠新鮮。最近得朋友極力推介，說太子有間「福來居」的海鮮小菜相當不俗，即管試試。一坐下店員即時送上例湯，以為免費等如馬虎？大錯特錯了，老火湯清甜無味精，落足心機煲。說回主題「海鮮」，招牌菜有豉椒炒蟶子、椒鹽瀨尿蝦等，蟶子由蘇格蘭空運到港，炒得入味；瀨尿蝦亦濃香肉厚。老闆更推介了一道「涼瓜炒膏蟹」，蟹膏豐腴、涼瓜甘香。吃得出所有用料皆非常新鮮，下次必定會再來幫襯。