遊車河催運　初五東北行

每逢過農曆新年，除咗要知自己今年使唔使攝太歲外，對駕駛一族而言，相信會更加關心流年揀邊種顏色嘅車、點樣配搭嘅車牌組合先可以催旺運勢，筆者專誠訪問咗林炳南師傅指點迷津外，仲請教埋新春期間，趁今個周末遊車河行大運，唔理你想催財運定係谷桃花，不妨應節走番轉、轉出好運來！

今年係壬辰龍年，天干屬水，大利顏色屬黑，唔通人人都要揸部黑色車先有運行？梗係唔可以一概而論啦，林師傅提到黃、杏、啡及灰都係流年吉利顏色，至於邊種最夾你，就要睇埋閣下嘅生肖做配對，不過咁多顏色嚟講，白色可算係流年最唔鼓勵嘅選擇（肖狗、豬者例外），鍾意開白色車、今年又有意換車嘅車迷要再三考慮喇（詳情見附表1）。既然係龍年，當然要醒多各位龍仔、龍女幾句，閣下今年犯太歲，情緒較易波動，所以揸車記住「忍」字行頭、多多禮讓。

車牌篇：催運五個冧把

自訂車牌計劃唔只畀車主發揮創意，從玄學角度嚟講更可趨吉避凶，林師傅解釋0至9係計算玄學嘅基本組合，「1」字對壬辰龍年嚟講就唔多有利（肖馬者除外），好彩行運數字有唔少，包括2、4、5、6及9，用呢五個「冧把」作出唔同配搭，有助提升各種運勢，一於清清楚楚列做「附表2」畀大家睇，等各位對號入座有運行！

飾物篇：平安龍鳳配

除咗車身顏色及車牌組合，原來車廂擺設都有催運作用，尤其是提升人緣嘅桃花運，人緣好，事業、愛情都得心應手啦！林師傅話壬辰龍年嘅桃花位喺南面，以車廂嚟講，即係後排左邊附近，若果閣下仍屬單身，可以考慮將心形物品，例如公仔、朱古力等放喺呢個桃花位。除此之外，揸車一族最緊要路路平安，林師傅建議可以喺車內放置雞形飾物，因為今年屬龍，而雞一般被當作鳳嘅化身，咁做正好夾到「龍鳳配」嘅寓意。

路線篇：黃大仙到大埔

新正頭遊車河行大運，係唔少車主一族嘅指定應節活動，林師傅教路今日係大年初五丁亥日，最有利嘅方位係東北方，宏觀嚟講，黃大仙、沙田及大埔都列入東北區嘅範圍，不妨考慮今日揸車去以上地區兜番轉，以黃大仙為起點，再順序駛入沙田、大埔林村及大美督一帶，催運之餘仲可以當埋郊遊。

行運起點：拜黃大仙要趁早

冇人不識嘅黃大仙祠，去年園內新增太歲元辰殿，善信可向黃大仙祈福外，仲可以因應不同生肖到元辰殿參拜。不過黃大仙區嘅泊位唔算多，加上新春期間係善信到訪嘅高峰期，除咗要早啲到搵位泊，建議大家要把握時間，上完香就好快快返上車起程，至於黃大仙祠嘅開放時間為早上7時至下午5時半。

行運第二站：買風車要格價

雖然多數人都會揀年初三到車公廟參拜，不過呢日一定逼爆人，正所謂有心唔怕遲，只要夠神心，年初五去亦無大問題。一場嚟到，梗係要擊鼓畀車公知「我來也」、轉轉風車之餘，唔少得買埋幸運風車返歸，提提你，廟內風車價格都幾參差，問多幾間格價穩陣啲。

行運第三站：入林村許願

遊完車公廟就直上大埔，想許願梗係要到林錦公路放馬莆村嘅林村許願樹，雖然依家已經冇得拋寶牒，不過都可以到樹旁嘅許願亭許願。由於林錦公路一帶車位唔多，搵泊位要花多啲耐性，至於許願樹旁有餐廳，其中嘅許願樓客家菜館就提供中菜及自製山水豆腐花，新春期間照常營業。

口福推介：許願樓客家菜館

營業時間：周一至周四早上9時至下午6時；周五及公眾假期早上9時至晚上9時

地　　點：大埔林村許願樹放馬莆4B地下

查　　詢：2668 1928

行運第四站：大美督祭五臟廟

入埋林村都仲有時間嘅話，回程前可到大美督一帶醫肚，汀角路大美督巴士站對面嘅大美督村一帶食肆林立，最特別係有多間中、泰式餐廳，除咗應節盆菜，仲有冬蔭功湯、泰式雞飯及串燒等惹味食品。巴士站附近設有大型停車位，但要留意設有收費咪錶及免費停泊兩種車位之分。

口福推介：BB開心棧

營業時間：周一至周六早上10時至晚上11時；周日及公眾假期早上8時至晚上11時

地　　址：大埔汀角路龍尾村60號

查　　詢：2947 6633