齊玩體感 Party Game 唔使搵交嗌

是日赤口，相嗌唔好口，倒不如同親友聚首一堂玩Party Game用笑口取代赤口！如果一班麻甩仔、麻甩佬聚首，開隻《Winning》就夠；但要滿足男女老少嘅喜好，體感遊戲就係最佳選擇。玩體感遊戲一來唔需要太花時間熟習玩法，而且新年期間大家定必大吃大喝，郁身郁勢更可順勢消脂Keep Fit！

Xbox 360 Kinect

其他體感遊戲都需要使用控制器操作，目前只得Xbox 360 Kinect可以完全飛甩控制器，齋用身體操控就得，就算幾多人開Party都唔使特別準備啲乜，玩得隨心又過癮！

Kinect好玩推介：《Kinect Sports : Season 2》出汗Keep Fit $259（a）

運動類型係最受歡迎的體感遊戲，完全唔需要花時間訓練，只要懂得該運動基本玩法就即時可玩。出到第二集的《Kinect Sports : Season 2》將上集六款運動項目轉晒，改為滑雪、美式足球、網球、棒球、高爾夫球和飛鏢，如果想Hea玩的話，可揀高爾夫球同飛鏢；若想出身大汗兼Keep Fit，可以同埋親朋戚友挑戰滑雪或美式足球，遊戲系統內的鏡頭更會不時偷影大家全身運動時的滑稽模樣，個個玩到嘻哈大笑，唔怕會嗌交！

《Kinect : Disneyland Adventures》虛擬遊樂園 $259（a）

新年假期要入迪士尼樂園玩，預咗人山人海，排隊多過玩。樂園設施係好玩，但如果唔想同人逼，同親友在屋企都可以開着Xbox 360隻《Kinect : Disneyland Adventures》齊齊玩，感受虛擬樂園氣氛。遊戲內容跟真實樂園都幾相似，場內設有多個遊玩專區，譬如可跟Peter Pan在空中翱翔，跟巴斯光年在太空射擊。而筆者最Like就係可以同迪士尼人物抱抱，首選當然係白雪公主啦！

《Kinectimals : Now with Bears》與熊共舞 $259（a）

第一集《Kinectimals》養獅子、老虎和豹，雖然造型已盡量做得可愛，但始終天性太過兇猛，唔夠闔府統請，要扣啲分；剛推出的第二集就改為「與熊共舞」，追加北極熊、黑熊同熊貓等五種可愛熊仔陪大家玩，玩家可以教熊仔平衡、執東西同跳繩，熊仔更懂得撒吓你嬌呢。

《型可塑2》男女啱玩 $388（a）

新年期間食得多油膩食物，如果玩遊戲的同時能夠做運動Keep Fit就最好不過。《型可塑2》就係一套男女都啱玩的體感健身遊戲，今集收錄大量舞蹈模式，幾啱女士們邊跳邊燒脂；男士們可選擇挑戰各類型長跑練習，可透過虛擬畫面置身倫敦、巴黎、紐約的街道中跑步；而且遊戲少不了有趣的迷你遊戲，遊玩的同時可睇見消耗了多少卡路里，愈玩愈有興致。

WiI & PS Move

講開體感Party Game，又點少得Wii同PS Move嘅出品呢！小記一於介紹幾隻心水遊戲畀大家！

Wii好玩推介：《Just Dance Wii》日韓勁舞 約$400（a）

去年10月推出的體感跳舞遊戲《Just Dance Wii》在日本大賣，除拎起Wiimote跟畫面上指示起舞夠玩外，當然還少不了收錄了AKB48、倖田來未、BoA、Morning娘、東方神起等日韓人氣偶像的歌曲，都好啱香港的哈日、哈韓族。遊戲還收錄有趣跳舞模式，譬如兩人可各自跳不同舞步的Duet Song模式及挑機的Dance Battle模式，定可跳個痛快！

《Mario & Sonic at London 2012》預演奧運 約$400（a）

兩大遊戲系列Mario及Sonic聯手打造的體感奧運遊戲，是每個奧運年最教Game迷期待的作品。新作《Mario & Sonic at London 2012 Olympic Games》除由兩大陣營眾多經典遊戲角色擔綱演出外，還收錄多達30種運動競技項目，由短跑、足球到韻律泳都有，預早感受奧運熱之餘，更可做運動強身健體呢！

《聽力把戲》鬥金耳朵 約$400（a）

剛在上星期推出的Wii新遊戲《聽力把戲（Kikitorikku）》就少有地考玩家聽力。遊戲名稱就係由日文「聽力」加上「Trick」組合而成。玩法係在嘈雜的背景中聽說話內容，聽出不可思議的聲音以及同其他三名玩家玩聽覺Battle，鬥快聽出內容。過程有趣，在日本方面是一隻幾值得期待的作品，不過對香港玩家而言，先決條件係要聽得明同睇得明日文囉！

PS Move好玩推介：《Carnival Island》魔法歷險 $258（b）

可支援四人比賽的《Carnival Island》，讓玩家體驗魔法嘉年華島嶼的歡樂氣氛，玩多達35款逗趣迷你遊戲，重拾魔法島的繁榮景象。玩法跟《Disneyland》相似，但遊戲加入不少有趣點子，如可收集數十種小寵物，還可利用AR技術製作有趣相片在PS Network上分享。

《Start the Party ! 2 Save the World》親身上陣 $258（b）

《Start the Party》是PS Move首發遊戲之一，到第二集《Save the World》繼續走輕鬆易玩路線，透過PS Move動態控制器跟糟糕博士在一眾迷你遊戲中一決高下。迷你遊戲內容都幾有趣，遊戲更會將玩家投射在畫面上玩撈魚、拯救落難潛水員等有趣任務，保證可笑餐飽！

Online買Game

現時大部分Game 舖到年初二都已經開門，不過要專登出去買隻遊戲返屋企玩又可能唔多願郁。不過好在可以透過Xbox LIVE或PlayStation Network，在Xbox 360及PS3主機上直接購買遊戲玩，而且亦所費無幾。

Xbox LIVE Arcade：《Trine 2》三人出征

由三大角色法師、盜賊跟騎士結伴出征的魔法冒險遊戲，大玩冒險、動作以及益智謎題元素，單人玩時隨時轉換角色出擊，此外還支援三人協力對戰，互相幫手闖難關。

下載費用：1,200 MS Point

《Joe Danger : Special Edition》搞笑特技

畫面相當有趣的賽車特技遊戲，除基本100個關卡外，還增設「實驗室」版50個新關卡，而且支援四人挑戰模式，值得一玩！

下載費用：1,200 MS Point

PlayStation Store：《Cubixx HD》射破方塊

遊戲為兩年前《Cubixx》的高清版，用上Cubot射破立體方塊內的敵人，唔難上手的同時，還有50個關卡可供挑戰。除一般Score Attack、Line Attack、Time Attack模式外，仲支援七人組隊合作模式。

下載費用：$78

《Apples to Apples》鬥Match綠卡

由卡片遊戲移植到家用遊戲機上的派對遊戲版本，玩法是其中一名玩家，作為裁判抽中一張綠卡，其他玩家就要從卡片中找出最Match這張綠卡的卡片以分勝負，雖然未必個個識玩，但可支援到四人以對戰，好有Party Feel。

下載費用：$78

龍年優惠：買Kinect套裝額外送Game

農曆年間Xbox 360特別推出龍年優惠，其中「龍精虎猛」動態遊戲優惠就最筍；只要買任何一款Xbox 360主機套裝連《Kinect Sports》體感遊戲，就免費送多套《Kinect Joy Ride》體感賽車遊戲，加上本身Kinect套裝都有遊戲送，一次過就有大把遊戲玩，優惠期仲去到2月28日，遲啲拆晒利是先買都未遲！而由明日年初四（1月26日）開始，Xbox 360 Kinect更會在尖沙咀海港城海運大廈大堂搞Kinect Roadshow，除有一系列Kinect遊戲試玩外，還擺設高達3.5米高的巨型富貴天秤，畀大家磅重睇吓玩完體感遊戲後，消脂效果有幾強添！

活動小資料

日期：1月26日至2月1日

時間：中午12時至晚上10時

地點：尖沙咀海港城海運大廈大堂

查詢：（a）2359 7998　（b）2341 2356　（c）3071 4868