Mickey、Minnie齊拜年 祝你好口福

紅假遊主題樂園，摩肩接踵是必然之事，更何況是新正頭！想與Mickey、Minnie過農曆年，又不想與人逼的話，其實都有方法；「迪士尼卡通人物造型迷你美食食玩」Set 2剛剛上架，Mickey和Minnie齊齊換上紅噹噹的醒神唐裝，加上地道化的新年場景，一片喜氣洋洋，兩套一齊帶回家，過年就更有氣氛啦！

早前介紹獲迪士尼授權、由mimo Team設計、威龍（Dragon）生產的「迪士尼卡通人物造型迷你美食食玩」系列，繼Set 1的「奇妙麵店」和「奇脆餅店」，農曆新年版的Set 2已經接棒，今趟Mickey變身為「新春步步高」的賀年食品店老闆；Minnie就在「年年慶團圓」中大演廚藝，兩者均以食為題，可能創作團隊想祝大家龍年有口福！

步步高　Mickey賣年貨

由Set 1到Set 2，這個食玩系列的服裝設計到場景布置，都以香港地道文化為大方向，先說「新春步步高」，店主Mickey便穿上傳統唐裝，店內有瓜子、煎堆、開心果、糖蓮子、年糕和糖果等各式賀年食品，齊全之餘又造工精緻。店內裝潢就以紅色為主，加上揮春和木傢俬等小道具，一派港式小店風味，對香港人而言，分外有親切感。

慶團圓　Minnie持家有道

辦年貨之餘，家中亦已煮了好幾味！「年年慶團圓」的場景主角，除有作恭喜手勢的Minnie外，就輪到放滿桌上的各式餸菜，包括「年年有餘」的蒸魚、「哈哈大笑」的大蝦、「發財好市」的髮菜蠔豉，還有過時過節不可少的雞和鮑魚等共八碟餸菜，豐富之餘，賣相更維妙維肖。至於過年必備的大桔、水仙花、揮春和全盒等都一一落齊，筆者都想到Minnie家中拜年呢！