一粒鐘 郁手速洗愛驅
年廿八，係人都知要洗邋遢，唔只屋企大掃除，車主一族都要的起心肝省靚部車啦！仲有兩日就過年，洗車屋喺呢段日子通常都會排長龍，可能仲會加價，想划算洗車的話，不如自己郁手啦，慳到錢、又可以當做運動，而且過程未必係想像中咁難搞，何樂而不為？
只要有齊「架生」、用啱方法，無論男女都可以喺一小時內速洗愛驅，唔係想像中咁大工程。不過洗車地點就要慎重考慮，好似高流量嘅路邊或多人出入的通道皆不宜，以免影響其他道路使用者。同時洗車要有公德心，千祈唔好隨街傾倒污水，或者喺公眾地方棄置化學物品（例如偈油），破壞環境之餘仲係違法行為，咪制呀！
壓軸洗輪圈
一般嚟講，預備洗車用品唔使太大陣仗，大概都係七、八樣，有齊塵掃、玻璃水、吸水布、水桶、除臭炭、車身及輪圈清潔劑就夠，唔使$500就可以買齊，仲可以用好多次，又使乜排隊幫襯洗車屋？順帶提醒大家，行車過後唔好即時向輪圈淋水，避免煞車碟因冷縮熱脹變形，影響制動效能，所以最好將清潔輪圈排喺最後一部分。
先除塵後濕身
另一方面，洗車切忌心急，千萬唔好一開始就用濕布拭抹，否則好易刮花車身，正確方法係先用塵掃掃走車上灰塵，之後先整濕車身，再用清潔劑及濕布或海綿清洗，去除較深層嘅污垢及油漬，最後用埋清水沖洗及利用吸水布抹乾就成事。至於輪圈、玻璃及內櫳皮革，就要出動專用清潔劑，只要你部車唔係污糟得好緊要，否則跟足小記建議去做就OK。
唔使過水清潔劑
今天係中國廿四節氣之一嘅「大寒」，天文台預測今晚氣溫開始下降，明日仲會跌至接近10℃，洗車整濕身、分分鐘冷親。現時市面有產品標榜冇水洗車，例如滑時德（Werkstat）神仙水就係其中之一，只要將清潔劑噴喺車身表面，就可清走污漬，超方便，萬一中咗雀屎，只要一噴一抹，話咁快就搞掂！
查詢： 2770 4799（金輪汽車）、 2498 7197（890汽車）、2728 8707（動力工房）
唔夠高洗車頂，伸縮車擦就幫到手。
洗軨水可以清除頑固污漬，但係切記唔好用嚟洗車身。
洗車後必須用吸水布將水點完全抹乾，以免留低水漬。
軚環容易積聚細菌，係必須清潔嘅重點位置。
去油膜玻璃水（400ml）$65
水撥刮唔清玻璃上嘅雨水？好大機會係玻璃表面上嘅油膜造成，只要用具去油膜功能嘅玻璃水，就可解決問題。
洗軨水（710ml）$98
Hot Rims全能洗軨水適用於各種金屬（包括合金及電鍍）輪圈，備有軟化乾涸迫力粉及頑固污漬嘅功效，用後令輪圈煥然一新。
洗車液（473ml）$88
包含咗清潔及滋潤車漆功效，泡沫豐富有助清除污垢，令車身表面回復光亮，另備1.89L及3.79L加大裝。
吸水布（690×430mm）$73
洗車後必須抹掉車身表面嘅所有水點，否則有機會出現難睇嘅水印；唔想前功盡廢，強力吸水布就大派用場。
塵掃（530mm長）$98
以極細纖維織成，能夠吸起灰塵、花粉、黃沙等細小物質，洗車前喺車身以同一方向掃，就可避免洗車時刮花車身。
皮革清潔護理噴劑（450ml）$98
由獨特嘅不油膩及不發白配方製成，能夠一次過清潔、滋潤及保護皮革製品，最啱用喺座椅、軚環及門壁等位置。
消臭極炭（350g）$68
利用活性炭嘅吸味原理消除臭味，而且效力強勁、使用方法又簡單，只需放喺座椅下面，自動發揮辟味功效。
$198